Аёлнинг фотосуратларига махсус дастур ёрдамида қайта ишлов бериб, тарқатиш билан қўрқитган йигитча қўлга олинди
Наманган вилояти, Тўрақўрғон туманида яшовчи 20 ёшли (аёл) Ғ.Ш. ариза билан мурожаат қилиб, “Телеграм” мессенжерида “Тишина” аккаунт эгаси, Ғ.Ш.нинг турли фото-суратлари ва беҳаё тасвирларини интернет ижтимоий тармоғи орқали тарқатиб юбориш билан қўрқитаётганлигини маълум қилган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, мазкур жиноятни Фарғона вилояти, Қува туманида яшовчи 21 ёшли М.З. содир этганлиги аниқланган.
Гумонланувчи сифатида тергов органларига жалб этилган М.З., Ғ.Ш.нинг профилидаги фотосуратларини юклаб олиб, уларга махсус дастур ёрдамида қайта ишлов бериб, яланғоч ҳолдаги беҳаё фотосуратлари борлигини ва ижтимоий тармоқларга тарқатиб, шарманда қилиш билан уни қўрқитиб келганлиги маълум бўлди.
Мазкур ҳолат юзасидан Ўзбекистон Республикаси ЖКнинг 141.1-моддаси, 1-қисми билан жиноят иши қўзғатилиб, М.З.нинг содир этилиб фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда.
Қонунга мувофиқ, Ўзбекистон Республикаси Жиноят кодексининг 141.1-моддаси, 1-қисмидаги жиноий хатти-ҳаракатлар учун базавий ҳисоблаш миқдорининг тўрт юз бараваридан олти юз бараваригача миқдорда жарима ёки уч юз олтмиш соатгача мажбурий жамоат ишлари ёхуд уч йилгача ахлоқ тузатиш ишлари назарда тутилган.