Осиё Кубоги. Қатар пенальтилар сериясида Ўзбекистонни мағлуб этди ва ярим финалга чиқди

Футбол бўйича Осиё Кубогининг чорак финалида Ўзбекистон терма жамоаси 3 февраль, шанба куни мусобақа мезбони Қатарга қарши баҳс олиб борди.

Учрашувнинг 27-дақиқасида Ҳассан ал-Ҳайдос қанотдан кириб бориб, зарба берди ва тўп Ўткир Юсуповга тегиб, дарвозадан жой олди. Шу тариқа Қатар ҳисобни очди. Биринчи бўлим қатарликларнинг кичик устунлигида якунланди.

Иккинчи бўлимда эса Ўзбекистон фаолликни оширди. 58-дақиқага келиб эса мувозанат тикланди. Одилжон Ҳамробеков ажойиб зарба билан дарвозани ишғол қилди. Қолган дақиқаларда дарвозалар ишғол этилмади ва жамоалар қўшимча бўлимларга мурожаат қилди.

Қўшимча бўлимларда ҳам дарвозалар дахлсизлиги сақланиб қолди ва ғолиб номи пенальтилар сериясида аниқланадиган бўлди.

Пенальтилар сериясида эса мусобақа мезбонларининг қўли баланд келди ва ярим финал йўлланмасига эга чиқди.

Қатар 7 февраль куни ярим финалда Эронга қарши баҳс олиб боради.

Осиё Кубоги
1/4 финал босқичи
3 февраль, шанба

Қатар — Ўзбекистон 1:1 (3:2)
Голлар: 1:0 — 27 Ўткир Юсупов (автогол), 1:1 — 58 Одилжон Ҳамробеков.
Қатар: Баршам, Ро-Ро, Лукас Мендес, Али, Салмон (Муҳаммад, 90), Тарек, Абдулваҳоб, Габер (Ҳатем, 81), Фатаҳи, Афиф, Ал-Ҳайдос (Мунир, 54), Али.
Ўзбекистон: Юсупов, Эшмуродов, Ашурматов, Абдуллоев, Сайфиев (Абдираҳматов, 99), Турғунбоев (Ҳамралиев, 105), Ҳамробеков, Шукуров, Ўрунов (Умаров, 74), Файзуллаев (Эркинов, 114), Машарипов.
Огоҳлантиришлар: Баршам (46), Шукуров (69), Мунир (89), Ашурматов (90), Али (90).