Грузия 2024 йилда АҚШ билан ҳарбий машғулотлар ўтказади

^{Архив фото: Sputnik}
2024 йилда Грузияда АҚШ билан Troojan Footprint қўшма ҳарбий машғулотлар ва Noble Partner кўп миллатли тренинглари ўтказилади. Бу ҳақда бош вазирликка номзод Ираклий Кобахидзе дастурида айтилган.

“2024 йилда Грузия АҚШ Европа қўмондонлигининг махсус штаб-квартирасини қабул қилади. Кўп миллатли оператив кучларнинг Troojan Footprint машқлари ҳамда Noble Partner Америка—Грузия кўп миллатли машқлари. Бундан ташқари, Грузия ҳарбийлари АҚШ томонидан хорижда ташкил этиладиган машғулотларда қатнашади”, — дейилади ҳужжатда.

Дастурда қайд этилишича, 2024 йилда АҚШ молиявий кўмаги доирасида Грузия Мудофаа вазирлигига ажратиладиган маблағ 50 миллион доллардан ортиқни ташкил этади. Икки томонлама ҳамкорликда асосий эътибор Грузия мудофаа кучлари техникасини модернизация қилишга қаратилган.

2023 йил сентябрь ойида Грузияда НАТО давлатлари ва ҳамкорлари ҳарбий хизматчилари иштирокида Agile Spirit кўп миллатли машқлари якунланган эди. Уларда 21 давлатдан 3 мингдан ортиқ ҳарбий хизматчилар қатнашди. Машғулотлардан мақсад ҳарбий амалиётларни режалаштириш ва амалга оширишда НАТО мамлакатлари ва ҳамкорлари қуролли кучларининг ўзаро ҳамкорлигини оширишдан иборат бўлган.