Даврон Файзиев Ўзбекистон МТЖнинг Қатарга қарши учрашувдаги имкониятларини қандай баҳолади?
0
Кеча Осиё Кубогида чорак финаллар старт олди. Бугун ушбу босқич доирасида Ўзбекистон миллий терма жамоаси Қатар билан куч синашади.
Учрашув Тошкент вақти билан 20:30да старт олади. Ўйинни таниқли шарҳловчи Даврон Файзиев шарҳлаб боради. Беллашувни "Спорт" телеканали жонли эфирда намойиш этади. Даврон Файзиев телеграмдаги саҳифасида терма жамоамизнинг имкониятларини юқори баҳолади.
- Бугун терма жамоамиз ўзининг энг яхши натижасини такрорлаши мумкин. Ўша 2011 йилги чемпионат ҳам Қатарда ўтганди. Ўшанда ҳам мезбонларни ютгандик, фақат старт учрашувида. Чорак финалда ҳам насиб қилса уддалаймиз! Тўғри, Қатар амалдаги чемпион, ўз уйида, тўла стадионда ўйнайди. Айнан шу факторлар уларга кўпроқ босим юклаши мумкин.
Қолаверса, Ўзбекистон доим Қатар учун оғир рақиб бўлган, ўзаро ўйинларда 9 бор ғалаба қозонганмиз. Тарих ва статистикани четга суриб, жамоалар солиштирилгандаям устунлик бизда, деб ўйлайман. Бу таркибимиз катта ютуқларга кучи ва потенциали етиши ҳақида анчадан бери айтиб келаман. Бирга ишлаганим учун ўзига бўлган ишончини кўрганман. Бугун ҳам эфир орқали биргамиз. Ҳаммамиз. Сизга ўйин атмосферасини, йигитларга эса сизнинг энергиянгизни етказишга ҳаракат қиламан. Олға Ўзбекистон!, - деди Даврон Файзиев.