Исроил раҳбарияти Фаластин давлати тузилиши масаласини ошкора рад этди

^{Photo: Getty Images}
15 февраль куни Исроил бош вазири Биньямин Нетаньяху идораси матбуот котиби ҳозирча Фаластин давлати ҳақидаги ҳар қандай муҳокама рад этилишини маълум қилди. Бу ҳақда CNN нашри хабар берди.

Исроил бош вазири матбуот котиби Ави Химан матбуот конференциясида ҳозирда Фаластин халқи учун “ҳадялар” бериш пайти эмаслигини маълум қилган. Икки давлат ечими масаласи Исроил учун айни дамда муҳим мавзу эмаслигини ҳам қўшимча қилган.

Матбуот котибига кўра, ҳозирда Исроил қўлида кенг қамровли тинчлик лойиҳасини ишлаб чиқиш борасида режа мавжуд эмас. Бу режани амалга оширишга қаршилик қилувчи бир қанча сабаблар мавжуд.

“Биз ҳали ҳам 7 октябрь қирғини оқибатларини бартараф этяпмиз. Ҳозирги бош мақсадимиз — ҲАМАС устидан тўлиқ ғалаба қилиш. Биз ғалаба сари олға давом этамиз. Бундан бошқа масалалар ҲАМАС енгилганидан кейин бўлади”, — деган Ави Химан.

Олдинроқ АҚШ президенти Жо Байден исроиллик гаровга олинганлар ва фаластинлик асирларни озод қилишни кўзда тутувчи ўт очишни тўхтатиш келишуви икки давлат ечими асосида мустаҳкам ва кафолатлироқ тинчликка олиб келишига умид билдиришини маълум қилган эди. Исроиллик ўта ўнг сиёсатчилар эса парламентда икки давлат ечимини очиқ тарзда рад этган.