Октагон лигаси раҳбарияти ўзбекистонлик UFCга йўл оладиган жангчи номини ошкор қилди

Октагон лигасининг раҳбарияти айни вақтда Тошкентда бўлиб турибди. Биз ушбу фурсатдан фойдаланиб, уларга бир нечта саволлар билан мурожаат қилдик. Жавобларга лига раҳбарларидан бири Фарруҳ Абдумавлонов жавоб берди.

- Биламизки, Октагон промоушени Марказий Осиёда етакчи лига сифатида эътироф этилади. Айтингчи, сиз кутган проект бўляптими ёки яна ўзига хос сюрпризлар кутишимиз мумкинми?
- Тўғриси, ҳали қилинадиган ишлар кўп. Босқичма-босқич барчасини амалга ошириб бормоқдамиз. Олдинда сизларни жуда кўп янгиликлар кутиб турибди. Ўйлайманки, сюрпиризлардан хурсанд бўласизлар. Умумий олиб айтганда биз ҳозир ярим йўлдамиз!

- Октагон лигаси Алмати, Тошкент, Боку, Истанбул янглишмасам Бишкек шаҳарларида ўз турнирини ўтказди. География яна кенгайиши мумкинми?
- Режамизда албатта бошқа давлатларда ҳам турнирлар ташкил қилиш бор. Масалан, Хитой ва Ҳиндистонда ҳам ўтказиш истагидамиз.

- Ўзбекистонда фақат Тошкентда жанг кечаси ташкил этилмоқда. Бироқ, юртимизнинг бошқа вилоятларида ҳам буни ташкил этиш мумкинку?
- Бу борада ҳам ўйлаб кўрганмиз. Келажакда Самарқанд, Бухоро, Андижон шаҳарларида ҳам ўтказиш ниятидамиз.

- Seleсtion турнирини ҳам Ўзбекистонда ўтказcа бўлади, назаримда?
- Ҳа, шу ҳам режамиздан ўрин олган. Чунки, Ўзбекистонда жуда кўп истеъдодлар бор ва уларни кашф этиш мақсадидамиз.

- UFCнинг ва Дана Уайтнинг ютуғи у мухлисларни катта жангларни узоқ куттирмаслигида деб биламан. Октагон лигасини икки вазн чемпионлари жангларини уюштиришдан нима тўхтатиб турибди?
- Албатта, буни ҳам кўриб чиқамиз.

- Хориж промоушенлари билан қандай алоқаларни йўлга қўймоқчисизлар?
- Жаҳоннинг кучли 20 талик рейтингидан ўрин олган промоушенлар билан алоқаларимиз бор ва тез орада улар билан биргаликда ўзига хос проектларни ҳам амалга оширамиз.

- Жаҳон тажрибасидан келиб чиқсак, Rizin ва Bellator чемпионлари , Bellator ва PFL чемпионлари ўртасида турнирлар ташкил этилмоқда. Сизларда ҳам шундай идея борми яъни, бирорта промоушен етакчиларига қарши Октагон чемпионларини жангини ташкил қилиш?
- Аслини олганда бу жуда қийин бўлади. Чунки, ҳар бир промоушеннинг ўзини режалари бор. Бу борада ҳам ўйлаб кўрамиз. Бироқ, жаҳоннинг 20 талик рейтингидан ўрин олган промоушенлар билан бундай турнирларни ташкил қилиш ҳозир бироз имконсиз. Асосий мақсадимиз жаҳонда лигамиз чемпионларини Осиё чемпиони деган мақомга чиқариш.

- Достон Бозоров ҳамда Мажид Сардоров жангини ташкил қилишнинг қанчалик имконияти бор?
- Бу жангни ташкил қилишга ҳар доим тайёрмиз. Агар, спортчиларда барчаси жойида бўлса, бу амалга ошадиган тўқнашув.

- Бекзат Алмахандан кейин Октагон лигасидан UFCга йўл олиши мумкин бўлган 3 та жангчи сизнинг наздингизда кимлар?
- Бу жараён бошланган. Анвар Абдуллаев, Керим Даидов ва ўзимиз тайёрлаган чемпионлар бор. 3-жангчи ҳозирча сир бўла қолсин. Бу йилги проектларимиздан шулар ўрин олган.

- Жавоблар учун ташаккур!
- Раҳмат, эътибор учун!