12 йиллик интизорликдан сўнг аёл беш эгизакни дунёга келтирди

Эфиопияда 12 йил давомида фарзанд орзусида яшаган аёл бир йўла беш эгизакни дунёга келтирди. Бу ҳақда BBC маълум қилди.

35 ёшли Бадрия Адем “Ҳивот Фана” шифохонасида тўрт нафар ўғил ва бир нафар қиз фарзандли бўлди. Туғруқ 5 май куни кечқурун кесарча усул орқали амалга оширилган. Аёл ҳомиладорлик давомида доимий равишда шифокорлар назоратида бўлган ва мутахассислар унга тўрт нафар чақалоқ кутаётганини билдиришган. Аммо туғруқ жараёнида яна бир чақалоқ борлиги аниқланган.

“Қувончимни таърифлашга сўз тополмаяпман”, деди беш эгизакнинг бахтиёр онаси.

Айни вақтда она ва чақалоқлар шифохонада шифокорлар кузатуви остида қолмоқда. Янги туғилган чақалоқларнинг вазни 1,3 килодан 1,4 килогача бўлиб, шифокорлар уларнинг соғлом ўсиб кетиши эҳтимолини юқори баҳоламоқда.

Маълум қилинишича, Бадрия ҳеч қандай ЭКО муолажасисиз, табиий равишда ҳомиладор бўлган. Мутахассислар таъкидлашича, табиий йўл билан беш эгизакли бўлиш эҳтимоли тахминан 55 миллионда биттани ташкил қилади.

“Мен Яратгандан фақат битта фарзанд сўраган эдим, Аллоҳ эса менга бештасини ато қилди”, дейди она.

Бадриянинг сўзларига кўра, у йиллар давомида фарзандсизлик сабаб оғир руҳий тушкунликни бошдан кечирган.

“Эримнинг бошқа турмушидан фарзанди бор эди. У менга ҳатто битта фарзанд ҳам етарли бўлишини айтиб, доим далда берарди. Аммо мен қалбимда қаттиқ изтироб чекардим, чунки қишлоқ аҳли менинг фарзандли бўлишимга ишонмасди. 12 йил давомида кўз ёш тўкиб, одамлардан четланиб, тинмай дуо қилдим. Ниҳоят, Аллоҳ менинг илтижоларимни қабул қилди”, деди у.

Аёл деҳқончилик билан тирикчилик қилишини ва кутилмаганда катталашган оиласини қандай таъминлаш ҳақида ўйланаётганини ҳам айтди.

“Шунга қарамай, Аллоҳнинг ризқига, шунингдек, жамоатчилик ва давлатнинг кўмагига ишонаман”, дея қўшимча қилди у.

Қувончли воқеадан сўнг чақалоқларга Наиф, Аммар, Мунзир, Назира ва Ансар деб исм қўйилди.