(Казан, 25 июнь, «Татар-информ», Ксения Перепеченова). РФ Премьер-министры Татарстанны ТАССР төзелүнең 100 еллыгы белән котлады һәм республика халкына сәламәтлек, алга таба уңышлар, тынычлык һәм иминлек теләде. Михаил Мишустинның телеграммасын ТР Министрлар Кабинеты утырышында укыдылар. «Татарстан үзенең 100 еллыгын төрле өлкәләрдә зур казанышлар белән каршы ала. Бүген республика — мәгълүмат технологияләре, фәнни җитештерү, югары технологияле медицина актив үсеш алган эре сәнәгать төбәге, биредә автомобиль төзелеше, нефть эшкәртү һәм нефть химиясе комплексларында эре инвестицион проектлар гамәлгә ашырыла», - дип, Мишустинның котлавын укыды Россия Федерациясе Хөкүмәте Рәисе урынбасары Марат Хөснуллин. Россия Премьер-министры билгеләп үткәнчә, республикада мәгариф, мәдәният һәм спортны үстерү, күп гасырлык милли традицияләрне саклау, төрле милләт халкының һәм дин тотучыларның тату яшәве өчен күп нәрсә эшләнә. «Татарстанда яшәү, эшләү, уку һәм ял итү өчен аның халкына гына түгел, ә бу матур төбәк тарихына һәм мәдәниятенә кагылырга омтылган күп санлы кунакларга да уңайлы булсын өчен барысы да эшләнә», — дип искәртте Мишустин. Элегрәк республика юбилее уңаеннан котлау белән РФ Президенты Владимир Путин чыгыш ясаган иде.