Иделдә фаҗига: 4 кеше һәлак булган, 3 кеше имгәнгән
Казан янында Иделдә әйләнеп капланган көймәдәге 4 кеше һәлак, 3 кеше исән калган. Бу хакта «Татар-информ»га РФ Гадәттән тыш хәлләр министрлыгының Татарстан буенча баш идарәсендә хәбәр иттеләр.
Ведомство мәгълүматларына караганда, фаҗига Яшел Үзән районының Октябрьский бистәсе янында булган. Биредә 7 кеше утырган көймә әйләнеп капланган.
«3 кеше котылган, 4 кеше батып үлгән. Вакыйга урынына коткаручылар һәм ДИМС инспекторлары чыгып китте. Су өстендә 2 кешенең мәете табылды, тагын икесен эзләү дәвам итә», – дип аңлаттылар ведомствода.
Якынча белешмә буенча, пассажирларда коткару жилетлары булмаган. Моннан тыш, 6 кешегә исәпләнгән көймә артык йөкләнеш белән юлга чыккан.