Татарстан Сәламәтлек саклау министрлыгына яңа җитәкче билгеләнде
Альмир Абашев Татарстанның сәламәтлек саклау министры итеп билгеләнде. Бу хакта «Татар-информ» яза.
Альмир Абашев 1975 елның 6 декабрендә Казанда туган. «Дәвалау эше» белгечлеге буенча Казан дәүләт медицина университетын, аннары Казан дәүләт медицина академиясенең клиник ординатурасын, неврология, вертеброневрология һәм мануаль медицина кафедрасын тәмамлаган.
Республика вертеброневрология үзәгенең неврология бүлеге мөдире булган. Республика клиник неврология үзәге генераль директоры урынбасары булып эшләгән.
Ел ярым дәвамында «Обсерватория» республика балалар туберкулез шифаханәсенең баш табибы вазифасын башкарган.
2003 елдан 2016 елга кадәр 2 нче республика клиник хастаханәсенең баш табибы булган. Аннары 3 ел дәвамында Казан федераль университетының медицина-санитария бүлеген җитәкләгән.
2019 елның апреленнән Татарстан Республикасы Сәламәтлек саклау министрлыгы башлыгының беренче урынбасары вазифасын башкарган.
Исегезгә төшерик: агымдагы елның 6 июнендә 2023 елдан бирле ТР сәламәтлек саклау министры вазифасын башкарган Марсель Миңнуллин вазифасыннан китте. Бу хакта указны республика Рәисе Рөстәм Миңнеханов имзалады.