Рус православ черкови Константинополь Патриархати билан алоқаларни узди
Рус православ черкови Украин черковига Москвадан мустақиллик берган Константинополь Патриархати билан ҳар қандай муносабатларни тўхтатиш тўғрисида қарор қабул қилди.
Бу ҳақда 15 октябрь куни Беларусь пойтахти Минскда ўтган православ черкови руҳонийлари йиғинида Рус православ черковиниинг ташқи алоқалар мутасаддиси митрополит Иларион билдирди.
11 октябрь куни жаҳон православ ҳамжамияти лидери бўлган Константинополь Патриархи Варфоломей раислигида Истанбулда ўтган синод йиғилишида Украин православ черкови Москва тасарруфига ўтгани тўғрисидаги 1686 йилги битим бекор қилинган эди. Бу билан Киев метрополиясига Москвадан мухторият берилди.
Украина ҳукумати ва православ руҳонийлари бу қарорни олқишлаган, Москва эса танқид қилган.