Новости за 15.05.2024

Кемпир-Абад иши боюнча айыпталгандар 15-майда бийликке кайрылуу жолдоп, абактагы Кеңешбек Дүйшөбаевдин саламаттыгы начарлап, кан басымы көтөрүлүп, анын дарылануусуна шарт түзүүнү суранышты.

"Массалык башаламандыкка чакырууга" шектелип камалган акын жана активист Аскат Жетигендин иши сотко өткөрүлдү. Бул иш боюнча алгачкы отурум 14-майда Бишкектин Свердлов райондук сотунда болду.

15-майда Кыргызстанда жана дүйнөдө эмне болду? “Азаттык” күндүн башкы жаңылыктарын тизмектейт.

Грузин парламенти "чет элдик агенттер" мыйзамын кабыл алды. Бирок муну менен башкаруудагы партия толук жеңишке жетти деп айтууга болбойт. Бейөкмөт уюмдар Конституциялык сотко кайрылганы жатат, саясий жараян дагы уланмакчы.

Ош шаарында эки кабаттуу үйдүн тургундары мэрия турак-жай "кызыл сызыкта" жайгашкан деп, көп жылдан бери газ жана суу өткөрбөй жатканына нааразы. Жашоочулар колдорунда мыйзамдуу документтери бардыгына карабай мэрия кенемте төлөп берүүдөн баш тартканын айтып жатат. Ош мэриясы бул үйдү коммуналдык түйүндөргө убактылуу кошсо болорун билдирди.

Дагестан, Чеченстан, Калмыкия, Кубан жана Ставрополдон кулчулукка кабылгандар кайрылып даттанууда: жумуш издеп чарбаларга жана заводдорго барып калган адамдарды тамагын эптеп берип мажбурлап иштетишет.

Сузактагы үрөй учурган кырсыктан кийин социалдык тармактарда "Манас" эпосун жаш муунга кантип жайылтуу керектиги тууралуу талкуу күчөдү.

Кыргызстандан Орусияга ташылган жеңил автоунаанын саны кескин кыскарды. Статистикалык маалыматтар бул жааттагы эсеп былтыркыдан 83% азайып кеткенин көрсөтүүдө. Буга орус бийлигинин автоунаа импортун кескин кымбаттаткан чечими себеп болгон.