Новости за 04.01.2024

Нархига чеклов киритилаётган Аи-80 бензини, ҳайдовчиларга маълумот бериб борувчи LED-экранлар, ССВ раҳбариятидаги ўзгариш, тоғларда қор кўчиши хавфи ва бошқалар — «Газета.uz»нинг кунлик дайжестида.

Истиқболли лойиҳалар миллий агентлиги Binance халқаро криптобиржаси бўйича текширув ўтказди. Платформа операцияларни жиноий фаолиятдан олинган криптоактив ҳамда маблағлар билан амалга ошириши аниқланди. Шунингдек, криптобиржа Ўзбекистонда лицензиясиз ишлайди. ИЛМА Binance`га жарима солди.

Асилбек Худаяров Амрилло Иноятовнинг ўрнига соғлиқни сақлаш вазири вазифасини бажарувчи этиб тайинланди. Шунингдек, у Президент администрациясининг Ижтимоий ривожланиш департаменти раҳбарининг биринчи ўринбосари лавозимини ҳам сақлаб қолди.

Пойтахт ҳокимлиги ҳузуридаги Рақамли ривожланиш департаменти томонидан Бобур ва Шота Руставели кўчалари чорраҳасида фуқароларни реал вақт режимида йўл ҳаракатидаги вазият тўғрисида хабардор қилиш учун ўзгарувчан маълумотлар таблоси ўрнатилди. «Газета.uz» бу нима учун зарурлиги билан қизиқди.

1 апрелдан таркибида шакар бўлган газланган ичимликлар литри учун 500 сўм, энергетик ичимликлар учун 2000 сўм миқдорида акциз солиғи жорий этилади. Аввалроқ ичимлик ишлаб чиқарувчилар уларнинг инвестицион режаларига таъсир қилувчи бу чора олдиндан муҳокама қилинмаганига эътироз билдирганди.

Ўзбекистонда 2025 йилдан бошлаб далада сув ҳисоблагич ўрнатган ва тежамкор технологияларни қўллайдиган фермерлар учун солиқ коэффициенти камайтирилади. Аксинча ҳолатларда эса оширилади. Сув тежовчи технологияларни жорий қилиш учун имтиёзли кредит линияси ташкил қилинади.

Самарқандда иккита юк машинасининг тўқнашуви оқибатида улардан бири, 21 тонна лимон олиб кетаётган транспорт бутунлай ёниб кетди.

Ўзбекистон ҳукумати 2026 йилгача Аи-80 бензин ишлаб чиқаришдан воз кечмоқчи. Буни электромобилларни оммалаштириш ва улар учун инфратузилмани яратиш, Аи-92 бензин ишлаб чиқаришни кўпайтириш, газ қуйиш шохобчалари учун газ етказиб бериш ва бошқа чора-тадбирлар ҳисобига амалга ошириш режалаштирилган.

«Газета.uz» чекка ҳудудлардаги мактаб ва боғчаларга транспорт қатновини йўлга қўйиш ғоясидан воз кечилгани ҳақидаги хабарда ноаниқликка йўл қўйди. «Ўзбекистон-2030» стратегиясида 715 та мактабда ўқувчилар учун бепул автобуслар ташкил этилиши режалаштирилган.

Ўзгидромет Тошкент ва Наманган вилоятларининг айрим ҳудудларида 5−9 январь кунлари қор кўчиши хавфидан огоҳлантирди.

Президент фармони билан 1 майдан суд ҳужжатлари асосида ижро ҳужжатларини электрон шаклда бериш (юбориш, тақдим этиш) тартиби жорий этилади. Шунингдек, фуқаролардан қарздорликлари учун ундирув қаратилиши мумкин бўлмаган энг кам кафолатланган даромад белгиланади.

Ўзбекистондаги барча «заправка»ларда Аи-80 бензинига 8 минг сўмлик юқори нарх чегарасини белгилаш режалаштирилмоқда. Бундан ташқари, рақобатни ривожлантириш учун «Татнефть», «Лукойл», «Газпромнефть» ва Saneg компанияларини 80 дан ортиқ «заправка» қурилишига жалб этиш режалаштирилган.

Тармоқларда эски ТошМИ ҳудудидаги Тошкент кадетлар корпусининг собиқ босмахонаси биноси бузилиши мумкинлиги ҳақида хабарлар тарқалди. Маданий мерос агентлиги буни рад этиб, бино маданий мерос объекти экани ва давлат томонидан муҳофаза қилинишини билдирди. Фото.

2022−2026 йилларда янги Ўзбекистонни ривожлантириш стратегиясидан чекка ҳудудлардаги мактаблар ва мактабгача таълим муассасаларига транспорт қатновини йўлга қўйиш банди чиқариб ташланди.

Исроил Олий суди уни парламент ва бош вазирнинг қарорлари «оқилоналик тамойилига» зид бўлса, уларни бекор қилиш ҳуқуқидан маҳрум қилувчи қонунни бекор қилди. Ўзгартириш Беньямин Нетаньяху ҳукумати томонидан амалга оширилган ва мамлакатда оммавий норозиликларга сабаб бўлган.

Қозоғистон президенти Конституцияни ўзгартириш ва 2026 йилги сайловда номзодини қўйиш ниятида эмаслигини айтди. Шунингдек, у Назарбоев кетганидан кейин қўшҳокимият моделини жорий этишга уринишлар бўлганини ва унинг шериклари «сиёсий ўйинлари» сабаб «мамлакатни деярли парчалаб ташлаганини» тан олди.

Пайшанба тонгидан буён Тошкент шаҳрида ҳаво ифлосланиши даражаси нормадан ошмади. Соат 8:00 да PM2,5 заррачалари миқдори 5 мкг/м3 ни ташкил этди, бу — ЖССТ тавсиясига тенг.

Фарғона туманида асосий йўлга шошилиб чиққани айтилаётган Nexia-3 машинаси Tracker`га урилди. Оқибатда 2 йўловчи воқеа жойида вафот этди. Яна 3 киши шифохонага ётқизилди.

Ўтган йилда Аи-80 бензинига акциз солиғи вақтинча бекор қилингани сабабли давлат бюджетига 100 млн доллар камомад етди, шунга қарамай, Ўзбекистон аҳолиси бу имтиёздан деярли наф кўрмади. Энергетика вазирлиги бундан асосан тадбиркорлар фойда кўрганини тасдиқлади.

Мультимедиа ва дизайн хизматларини кўрсатувчи, шунингдек, киберспорт, венчур молиялаштириш ва мультипликация соҳасидаги компаниялар ҳам энди Ўзбекистондаги IT-Park резиденти бўлиши мумкин.