Новости за 12.04.2024

Cho‘ponotadan kelayotganda Shofayzi ko‘prigiga yetmay, Ko‘kchadan kelayotganda esa Shofayzi ko‘prigidan o‘tgach, chap qo‘lda “Paxtakor” mahallasi keladi. Bu yerda nomi kosmonavtikaga aloqador ikki ko‘cha bor. Birinchisi — Quyosh nuri; shunisi sizni Marsga ham olib boradi. “Gazeta.uz” 12-aprel kuni shu ko‘chalarni aylandi.

O‘zbekistonning Isroildagi elchixonasi Isroilda yashovchi fuqarolardan shaxsiy xavfsizlikka tahdid solishi mumkin bo‘lgan holatlarning oldini olish uchun yashab turgan joyini zaruratsiz tark etmaslikni so‘radi. Avvalroq OAV ikki kun ichida Isroilga Erondan to‘g‘ridan-to‘g‘ri hujum kutilayotgani haqida yozgandi.

Qozog‘istonda oiladagi zo‘ravonlikni jinoiy javobgarlikka tortuvchi qonun qabul qilindi. Hujjat kaltaklash va qasddan badanga yengil shikast yetkazish uchun jinoiy javobgarlikni nazarda tutadi, badanga o‘rtacha va og‘ir shikast yetkazish uchun javobgarlikni kuchaytiradi. Endi qonunni prezident imzolashi kerak.

Yangihayot tumanida Bestune, Cobalt va Damas avtomashinalari to‘qnashdi. Oqibatda uchala haydovchi ham olgan jarohati sababli shifoxonaga olib ketildi.

O‘zbekiston tashqi ishlar vaziri Baxtiyor Saidov Minskda Belarus prezidenti Aleksandr Lukashenko bilan uchrashdi. Belarus rahbari tovar ayirboshlash hajmini oshirish va qo‘shma korxonalar tashkil etish, xususan, BelAZ bilan kelishuvlarni bajarishga tayyorligini ma’lum qildi.

Toshkentdagi Bo‘rijar kanalida uch kishi, jumladan, 5 yoshli bola va uning onasi cho‘kib ketdi. Ikki qurbonning jasadi topilgan, uchinchisini qidirish ishlari davom etmoqda.

Yozuvchi Murod Muhammad Do‘st 75 yoshga to‘ldi. “Lolazor” romani muallifi bilan bog‘liq 2024-yilgi hozircha eng katta voqea — uning “Lolazor” podkastidagi chiqishi. Podkastning prezident Islom Karimovga bag‘ishlangan qismi alohida e’tiborga molik. “Gazeta.uz” podkastda aytilgan xotiralarni matnga ko‘chirdi.