Сызрань мөселманнары XIX гасырда яшәгән татар дин белгеченең каберен зиярәт кылды
(Казан, 18 ноябрь, «Татар-информ»). Сызрань шәһәренең «Ак калфак» төркеме Иске Кулаткы районының Яңа Зимница авылына Хәбибулла ишан Хансәвәров каберенә зыярәт кылырга барды.
Алар бирегә «Фәйзулла» һәм «Гали» мәчетләренә йөрүче мөселман хатын-кызлары белән бергә килде. Мөслимәләр әлеге сәфәрне галимнең тормышын һәм мирасын өйрәнү, шулай ук ватандашларыбыз арасында мөселманлыкны ныгыту максатыннан оештырды. Бу турыда «Самар татарлары» хәбәр итә.
XIX гасырда яшәгән мәшһүр татар дин белгече, шәех Хәбибулла Хансәвәровның (1805-1897) тууына быел 216 ел тулды. Ул Иске Кулаткы районында гомер иткән һәм шунда җирләнгән.
Ел саен Россиянең төрле төбәкләре һәм якын чит илләрдән күпсанлы хаҗилар ишан хәзрәтнең каберен зиярәт кылырга килә, диелә хәбәрдә.