25 ел буе район газетасының баш мөхәррире булып эшләгән ир-атны үтергәннәр
5 декабрьдә, шимбә көнне, Тула өлкәсенең Узловский районының «Знамя» газетасының баш мөхәррире Сергей Ванеевны үтергәннәр. Бу турыда үз чыганакларына сылтама белән «Интерфакс» хәбәр итте. Якынча белешмә буенча, җинаять көндезге икеләр тирәсендә була. Ул мәрхүмнең һөнәри эшчәнлеге белән бәйле түгел дип фаразлыйлар. Көнкүреш җәнҗалы вакытында исерек ир-ат Сергей Ванеевка пычак кадый. Күкрәк читлеге яраланган баш мөхәррир урында ук үлә. Җинаятьче үзе полициягә шалтыратып хәбәр итә. Россия Тикшерү комитетының Тула өлкәсе буенча Тикшерү идарәсе белешмәсе буенча, үтерүченең шәхесе ачыкланган. Ул мәрхүмнең 27 яшьлек танышы. Хәзер аның белән тикшерү эшләре бара. «Үтерү» маддәсе буенча җинаять эше ачылган. Сергей Ванеев 25 елдан артык вакыт дәвамында Узловский районының «Знамя» басмасының баш мөхәррире була. Ул Тула өлкәсендә иң дәрәҗәле редакторларның берсе. Сергей Ванеевка 54 яшь иде, дип яза «Вести Тула» .