Гүзәл Уразова янына күптәнге дусты килгән: «Бәйрәм ясады безгә, балакаем»

Гүзәл Уразованың Уфадагы концертына бөтен халык яратып өлгергән кечкенә тамашачысы Анечка килгән. Аня бу юлы да яраткан җырчысы һәм аның төркемен кочак-кочак бүләкләр, открыткалар, шарлар белән сөендергән. Өстәвенә, Илдар Хәкимов һәм Гүзәл Уразованы үзенең якын көннәрдә узачак туган көненә дә чакырган. Анечканың Элвин Грей белән дә танышасы килә икән. Ул Гүзәл Уразовадан үзен тагын бер яраткан җырчысы белән таныштыруын үтенгән.

«Анечкам килде би-ит. Тулы бер бәйрәм ясады безгә, балакаем. Рәхмәтләр яусын», – дип, Гүзәл Уразова самими кадрларны үзенең телеграм каналында күрсәтә.

Гүзәл Уразова – 5 яшьлек Аняның кумиры. Аня аның һәр концертын бик көтеп ала һәм аңа ныклап әзерләнеп килә. Декабрь аенда узган концертында Анечканың һәр бүлектә Гүзәл янына аның күлмәгенә охшаш образда чыгуын, Гүзәл Уразовага гына түгел, бөтен командасы – биючеләре, музыкантларына да чәчәкләр, шарлар, бүләкләр өләшүен язган идек.

• Гүзәл Уразова концертына килгән ятимә кыз тарихы бөтен залны елаткан

Аня – ятимә кыз, аны әбисе һәм карт әбисе генә тәрбияли. Беренче танышуларыннан соң Гүзәл Аня белән әбисен Казанга, үзләренә кунакка алып кайтты. Җырчы Аня белән зоопаркта, аквапаркта, кафе-кибетләрдә йөргәнен, Аняның җаны теләгән әйберләрен алып биргәнен дә күрсәтте.