Билгеле җырчының хатыны авариядә имгәнеп үлгән
Җырчы Ярослав Сумишевский инстаграмдагы сәхифәсендә хатыны Наташаның һәлак булуын хәбәр иткән. «Наташенька безнең белән юк инде. Аның йөрәге туктады», — дип язган ул. Юл һәлакәте 29 гыйнварда Ачинск — Ужур — Троицкое юлында була. Toyota Highlander машинасы Scania йөк машинасына бәрелә. Ул газ ташый торган цистерна була. Цистерна юл кырыена төшеп китә. Toyota Highlander автомобиле үзен куып җиткән Suzuki Grand Vitara автомобиленә дә бәрелә. Toyota Highlander белән Россия десантчылар берлеге рәисе Александр Гуляков идарә итә, ул урында ук һәлак була. Салонда танылган җырчы Ярослав Сумишевский һәм аның хатыны Наталья да утырган. Ярослав Сумишевский Солгон авылында чыгыш ясарга бара торган булган. Артист килеп җиткәнче авылдагы чараның тантаналы өлешен ачып җибәргәннәр. Фаҗига булганын белгәч, концертны туктатканнар. Ярослав Сумишевский үзе бер атна хастаханәдә ятып чыга, аннары терелүен хәбәр итә. Натальяны февраль башында санавиация белән Красноярск хастаханәсенә китерәләр. 6 февральдә аның үлүе билгеле була, дип яза «Комсомольская правда» .
Ярослав Сумишевский һәм аның гаиләсенең дусты, җырчы Марина Девятова бу хәлдән шокта булуын РЕН ТВ га әйткән. «Барыбыз да шокта. Наташа терелер дип уйлаган идек, ул бик көчле кеше иде», — ди Марина. Натальяга 38 яшь булган. Авариядә ул бик җитди имгәнгән һәм комага киткән. Җырчы үзе җитди имгәнмәгән. Ярослав белән Наташаның нәни улы Мирослав әнисез калган. Ярослав Сумишевский — җырчы, музыкант, телевидение алып баручысы, YouTube «Алтын төймә» иясе. Ул интернетта видеороликлар куеп, танылды.