Мацалла кхайкхийначу Сенцовн суьрташ даржийна Украинан омбудсмено

Оьрсийчуьрчу набахтехь волчу Украинан режиссеро Сенцов Олега мацалла кхайкхийна 88 де ду. Оьрсийн агIоно цуьнан шега кхачийна суьрташ зорбане даьхна Украинан омбудсмено Денисова Людмилас. Фейсбукерчу шен агIоне даьхна Денисовас и суьрташ.




Сенцовн могушаллин хьолах информаци елла Оьрсийчоьнан президентехула бакъонаш ларъян векал йинчу Москалькова Татьянас. Режиссер жигаре а ву, телевизоре хьажа а воьду, книгаш йоьшу цо, юкъ-кара цхьацца йозанаш а до, цо бахарехь.


Маршо Радионо яздира, Сенцовн йишас хаамбарх, иза ледарчу хьолехь ву аьлла. "ГIатталуш вац", "йист яла гIерта" аьлла, яздина шега адвокатехула кехат даийтина Сенцовс аьллера йишас.


Украинан омбудсмено дIахьедина, "муьлххачу а билламаш тIехь" Оьрсийчоьнца иза хийцарх дийца шаьш кийчу ду аьлла.


Стигалкъекъа-беттан 14-чу дийнахь дуьйнна мацалла кхайкхийна украинхочо Сенцов Олега, Оьрсийчоьно политикан бахьанашца лаьцна тутмакхаш маьршабахар тIе а дожош.


Бакъонашларъярхойн зерашца, верриг а Оьрсийчоьхь  набахтехь Украинан 64 вахархо ву.