Набахтера араваьккхина вац Сенцов

Оьрсийчохь хан тоьхна Украинан режиссер Сенцов Олег ша волчу Лабытнангерчу колонера араваьлла вац аьлла, хаамбина таIзарш кхочушдаран системан федералан урхалло (ФСИН). Шоьтан буса зорбанашкахь хаам баржийра, Сенцов колонера ара а ваьккхина, Салехардера доьдучу кеман тIе хиина аьлла. Журналисто Ивлева Викторияс шен Фейсбукерчу пена тIехь бинчу хаамна тIе а тевжина, яржийра информаци хаамийн гIирсаша.


Сенцовна гIо латточу кампанехь ю Ивлева. ТIаьхьо шен кхи информаци яц аьлла, яздира журналисто. "Со шеконашкахь ю, цунах бийлархьама хIоттийна кеп ю и аьлла", - яздина Ивлевас.


Хьалхо Сенцовн адвокато Динзе Юрийс элира, цуьнан могушаллехь хилаза ца болу хийцамаш хила тарло аьлла.

Стигалкъекъа-беттан 14-чохь дуьйнна набахтехь мацалла кхайкхийна режиссеро, Оьрсийчохь политикан бух тIехь чохь латтош болу тутмакхаш дIахецар тIе а дожош.


Аннекси йинчу ГIирмехь теракташ кечдина цо аьлла, бехкала воьллина Сенцов Олег Оьрсийчоьнан Iедалша. Бехк тIе ца буьту режиссеро.