Бакъонашларъярхоша Путине яздина кехат "гIучIа" бу аьлла Нохчийчохь
"И доцург а ду, шайна терго яйта лелош хIуманаш ду. Рамзан Ахматовича бакъонашларъярхошна кхерамаш тийсина бац. Юьхьанца бакъонашларъярхой дош къовларш юккъехь яздора, къепе боцу журналисташ а, бакъонашларъярхой ду шаьш бохуш, Нохчийчоь сийсазъян оьхурш а бу буьйцурш", - аьлла Умаровс.
Министро бахарехь, бакъонашларъярхоша "хIинццалц а бина болх, кхи дIа а бийр а бу".
Шинаридийнахь дуьненаюкъарчу Amnesty International, Human Rights Watch (HRW), Front Line Defenders организацеша диллина кехат яздира Путин Владимире, Кадыров Рамзанан дIахьедарш бахьанехь. Терроризмца шаьш къийсам латтош ду а бохуш, полисхоша адамийн бакъонаш хьоьшуш хилар билгалдаьккхинера кехат тIехь.
"Iедална критика ечарна дуьхьал а низамашца йоцу методаш лелайо ницкъахоша", - дIахьедора бакъонашларъярхоша.
Цул совнах, официалан тIегIанехь бакъонашларъярхошца шайн долу мостагIалла а Iедалехь болчара къайлахьош цахилар хаийтинера йозан тIехь. Кехатан авторша кхайкхамбора Путине, хIоьттинчу хьолана тIе тидам а бахийтий, дуьхьало яхьара Кадыровна, бакъонашларъярхой а, шеконашца лоьцучу нехан гергарнаш а маьрша бита алий.