Кавказ яккха араволуш ву "пластикан хирург" Браудэ
Кавказехь гIараваьлла цхьа башха "пластикан хирург": медицинан цхьа а доьшийла чекхъяьккхина а вац иза, амма хIетте а косметологин "инновацин техникаш" йовзуьйту семинараш вовшахтухуш, даккхий ахчанаш доху цо. Цхьа 1, 5 эзар стагна хIинцале а Iамийна цо, балдаш муха совсадо. Ткъа хIинца Къилбаседа Кавказехула чекхвала дагахь ву иза. 15 эзар сом мах бу цуьнан семинаре вуьтург.
Браудэ Емельян ю цу гурун цIе. Косметологаша дийцарехь, масех шо хьалха вийцаваьккхина иза социалан машанашкахь. ХIетахь Juvederm от Allergan санна йолу препараташ нахана дIасакхоьхьуш, курьер болх беш вара иза.
Стохка Iай дуьйнна мастер-классаш а луш, воккха говзанча хилла цунах косметологин сферехь. Бакъдерг аьлча, Емельянан методика ян а ю керла, дуьненчуьрчу пластикан хирургашлахь Iораяьлла а йоцуш.
Инстаграмерчу шен аккаунтехь Браудэс яздо, ша "дуьненчохь а цхьаъ ву тIедачу Iасалгца маха тухуш верг" бохуш, оцу методико "Iаламат дика жамIаш" гойту аьлла а хета цунна.
Dermaren цIе йолчу филлерца контуран пластика ян Iамаво цо шен семинарашкахь, амма цхьа проблема ю: Оьрсийчохь регистраци йина ю аьлла, тоьхна лоьмар яц оцу препаратна тIехь. Цул совнах, шен мастер-классашкахь Емельяна юьйцу Emelianox ботулотоксин, молханийн пачхьалкхан реестрехь а яц.
Росздравнадзоре Dermaren препарат таллар дехнера журналисто, хазаллин индустрин аналитико Москвичева Еленас. Цигара даийтинчу жоьпаца, Емельян – зуламхо ву: "..косметикан продукци ю аьлла, регистраци а йоцуш, зуламе а, контрафактан а препаратех пайдаэцарна дуьхьал Оьрсийчоьнан Бехктакхаман Кодексца 238 -гIа артикл ю".
Ша шех лаьцна Браудэ Емельяна кIеззиг дуьйцу, ца догIучу дагца, амма социалан машанашкахь цо лелош масех аккаунт ю.
"Кавказ.Реалии" порталан корреспондентан масех хаттарна жоп делира цо.
- Емельян, де дика дойла хьан! Тхан сайтан хеттаршна жоьпаш лур дацара ахь?
- Марша йогIийла! Дера лур ду-кх. Муьлхачу амплуахь хила дезаш ду вайн къамел ахь аьлчхьана, ахь боххучу тIегIанехь дийр ду-кх вай къамел.
- И муха хуьлу?
- Шоу ма ю хIара. Ткъа со МакГрегор Конор санна, ажиотаж оьшуш болх беш ву.
- Журналисташа а, профессионале косметологаша а чIагIдо, хьо корматалла караерзош, цхьанхьа а дешна вац бохуш. Бакъдуй иза?
- Оцу хаттарна ас жоп лур дац. Цхьанне а бала бац цуьнца.
- Семинарашкахь ахь пайдаоьцучу Dermaren а, Emelianox а препаратийн талламбар доьхуш, кехат дахьийтинера Москвичева Еленас Росздравнадзоре. Цунах лаьцна хIун эр дара ахь?
- Шмакозябрийн космосерчу векалалле а кехат дахьийта йиш ю-кх Москвичева Еленин. Соьга хаьттича, цуьнан кехаташ – хьекъал доцуш, бух болуш, боцуш ден дIахьедарш ду. Шантажхо ю иза, ахчанаш дохуш ю бохуш, массеран а бага а яхна. Сайн семинар йолош уггар хьалха ас даим а неIалт кхайкхадо лоьраша шаьш ахча а луш, препараташна реклама ечу тренершна а, компанина а. Оьзда ма дац иза! Сайн цхьанакхетаршкахь ас практикаца гойту, ткъа дикачу практико хазалла кхуллу стенцца а.
- Дагестанехь йоьдучу семинарехь балдаш совсош процедура ахь йинчул тIаьхьа, шен гIуллакх юхахьадаьллера бохуш, чIагIонаш йо цхьана жимчу зудчо. Ткъа ахь сийдоцуш бага туьйхира шега боху цо.
- И аьлла стаг ван а вац. И материал Хрусталеван дехарца кечйина яра. 1-чу каналан редактор ваьллера соьца зIене, тIетовжа агIо ца карорна цара эфире а ма ца яьккхира и материал.
И нах Iорабаха, и дуьйцург бакъ доций хаийта кхуьйкхуш ву со телевизионе. Суна ца лаьа цига ваха. Бакъдерг аьлча, сох харцдерг мел дийцина журналист юьхьIаьржа-м хIоттор вара ас тIаккха. Нагахь цара дуьйцучунна шу тIетахь, 1-чу каналан эфирехь церан могIарехь йоккхур ю ас шун цIе а.
- Кхерамаш туьйсуш санна хета суна ахь...
- ХIан-хIа, кхерамаш бац, амма цхьа сонта-м гур дара шу. Ас дукха интервьюш елла, уьш массо а цхьана эшшарехь хуьлу цундела. ХIинжа-ГIалахь хилла боху истори бух болуш яц, цомгашчу Хрусталеван коьрта чохь хIоьттина сурт ду и. Кеста иск кхачор ю ас РенТВ канална дуьхьал а.
- Инстаграмерчу блогехь ахь яздинера, хьайн белхан хIусамчу кIуьран шашка хецнера бохуш. И хьан дина хир ду аьлла хета хьуна? Хьанна, хIунда оьшура косметологна тIелата?
- Сан кабинет чу ца хецнера и, я кIуьран шашка а яцара иза. Цхьана хазаллин цIийне къевлинчу бараме хьошалгIа кхайкхинера со, цига Молотовн коктель чуластийнера.
- Полице хаам бирий аш?
- ХIан-хIа. Суна хаьара, иза мила ву. Цундела оцу стагна тIе а вахана, ас айса ерзийра конфликт. Краснодарера вахархо вара иза.
- Оьрсийчуьра хьо дIавахна аьлла, хаамбина ахь. Гуттаренна а вахна хьо, я цхьана ханна?
- Цхьана ханна. Йоллу Европехула пластикан, хирургин академешкахь мастер-классаш гайта дезаш ву со. Ишта-м кеста Кавказе воьдуш ву со. Соьлжа-ГIалахь а кхочур ву, Бакох а гIур ву. Дуьйла шу а сан цхьанакхетаршка, сан балхе хьажа, шайн бIаьргашца гур ду шуна тIаккха дерриг а.
Тамаше ду цхьа хIума. Браудэ Емельяна ца дуьйцу муьлхачу Европан шахьарехь ша ву а, я стенгахь доьшуш ву а. Цхьана а косметикан фирман, салонан, компанин коллархойн тептаршкахь билгалъяьккхина а яц цуьнан цIе.
Дагестанехь семинарашкахь дакъалоцучаьрга ахча тIедаккха аьлла, цо довзийтинчу картан долахо "Зухра Ашиковна А." ю
"Кавказ.Реалии" портална цхьана а кепара комментареш цунах лаьцна ца елира Сбербанко. Косметологаша-лоьраша чIагIдо, Браудэ Емельян цIе йолуш стаг ван а вац, косметологин тIегIане валархьама цо ша кхоьллина псевдоним ю иза бохуш.
Тхоьца хиллачу къамелехь, Dermaren и Emelianox препараташ ша лелош вац Браудэс аьллехь а, Инстаграмерчу шен аккаунтехь гойтуш ю цо уьш, мехаш а довзуьйтуш.