Латаран чемпионатехь Францин цIарах дакъалоцуш ву ялх нохчо

Маьршачу кепехь латаран Европерчу кегийрхойн  чемпионатехь Францин цIарах дакъа лоцур ду беккъа нохчех лаьттачу цхьаьнатоьхначу тобано. Летарш хIиттор ду Бухарестехь (Румыни), зазадокху-беттан 13-чуьра 19-чу дийне кхаччалц лаьттар ду уьш.


Ялх латархочо – Бибулатов Адама, Арсамерзуев Хьамзата, Сангариев Мухьаммад-Амина, Делиев Мохьмада, Магомадов Рахьима, Висханов Iадлана – дакъалоцур ду кеп-кепарчу йозаллин категорешкахь, аьлла ду Францин латаран Федерацин публикацехь.


Стохка оццу чемпионатехь Францин вовшахтоьхначу тобанехь а вара виъ нохчо.


20 шерашка бевллачу Европан а, дуьненан а чемпионан Магомадов Рахьиман доьзал Нохчийчуьра дIабахара 2007-чу шарахь. Ткъа Европан а, дуьненан а чемпионатехь борзан мидал йаьккхинчу Висханов Iадланан гергарнаш цул а шо даьллачул тIаьхьа махкара дIабахара. Шайн дIадахаран бахьана лерира Висхановс ненан цамгар а, "Оьрсийчуьра гIоьртина хьал" а.



Дуьненаюкъарчу олимпикан комитето (МОК) чиллан-беттан 28-чохь кхайкхамбира йоллу спортан юкъараллашка, спортхойн къийсамашка Оьрсийчоьнан а, Беларусин а цIарах болу спортхой ма бита аьлла. Ца хуьлчу далахь спортхошна магийта йиш ю элира МОК-н векалша нейтралан статусехь дакъалаца. Эксперташка хаьттира Кавказ.Реалиин редакцино, Къилбаседа Кавказерчу профессионалан спортана тIехь мел Iаткъам бийр бу цо аьлла.