რუსეთში სასამართლომ დამნაშავედ ცნო ლიბერალი პოლიტიკოსი, ყოფილი გუბერნატორი ნიკიტა ბელიხი
მოსკოვში სასამართლომ ქრთამის აღებაში დამნაშავედ ცნო ლიბერალი პოლიტიკოსი, კიროვის ოლქის ყოფილი გუბერნატორი ნიკიტა ბელიხი. დღესვე მოგვიანებით არის მოსალოდნელი განაჩენის გამოცხადება. პროკურორები მოითხოვენ ბელიხისათვის 10 წლით პატიმრობისა და 100 მილიონი რუბლის ჯარიმის შეფარდებას. ყოფილი გუბერნატორი ბრალდებებს უარყოფს და მის საქმეს სპეცსამსახურების პროვოკაციად მიიჩნევს. ბელიხის დაკავებას ხელმძღვანელობდა უშიშროების ფედერალური სამსახურის გენერალი ოლეგ ფეოქტისოვი - იგივე პირი, ვინც მუშაობდა ეკონომიკური განვითარების ყოფილი მინისტრის, ალექსეი ულიუკაიევის საქმეზე. ბელიხი 2016 წლის ივნისში დააკავეს. გამოძიების ვერსიით, ქრთამის სანაცვლოდ ყოფილმა გუბერნატორმა პირობა დადო, რომ გარკვეულ კომპანიებს შეიყვანდა ოლქის საინვესტიციო პროექტების სიაში.