სპორტის საარბიტრაჟო სასამართლომ სამუდამო ოლიმპიური დისკვალიფიკაცია მოუხსნა 39 რუს ათლეტს
სპორტის საარბიტრაჟო სასამართლომ სამუდამო ოლიმპიური დისკვალიფიკაცია მოუხსნა 39 რუს ათლეტს, რითაც დაუპირისპირდა საერთაშორისო ოლიმპიური კომიტეტის პოლიტიკას რუსეთში დოპინგის გარშემო სკანდალის შემდეგ. როგორც მსოფლიოში სპორტის ამ მთავარმა სასამართლომ 1 თებერვალს გამოაცხადა, მან საკმარისად არ მიიჩნია იმის მტკიცებულებები, რომ სოჭში 2014 წლის ზამთრის ოლიმპიურ თამაშებზე 28 ათლეტმა მართლაც დაარღვია ანტისადოპინგო წესები. ამ 28 ადამიანს, მათთვის დისკვალიფიკაციის მთლიანად გაუქმების შემდეგ, ცოტა დრო რჩებათ სამხრეთ კორეაში ზამთრის ოლიმპიურ თამაშებში ჩასაბმელად. რაც შეეხება დანარჩენ 11 რუს ათლეტს, სპორტის საარბიტრაჟო სასამართლომ დაადგინა, რომ ისინი დამნაშავე არიან დოპინგის გამოყენებაში, მაგრამ სამუდამო დისკვალიფიკაციის ნაცვლად დისკვალიფიცირებული არიან მხოლოდ წლევანდელ ოლიმპიურ თამაშებზე. რუსმა ოფიციალურმა პირებმა, რომლებიც გადაჭრით უარყოფენ დოპინგის სისტემაში სახელმწიფოს მონაწილეობას, არ დააყოვნეს საარბიტრაჟო სასამართლოს გადაწყვეტილებაზე გამოხმაურება და კმაყოფილება გამოთქვეს 28 სპორტსმენისთვის დისკვალიფიკაციის გაუქმების გამო. სასამართლოს გადაწყვეტილებას გამოეხმაურა საერთაშორისო ოლიმპიური კომიტეტიც: მისი განცხადებით, ვერდიქტმა „შესაძლოა, სერიოზული გავლენა მოახდინოს მომავალში დოპინგის წინააღმდეგ ბრძოლაზე“.