გერმანიის ავტორიტეტიან გამოცემა „შპიგელის“ ინფორმაციით, გერმანიაში მკვეთრად გაიზარდა საქართველოდან თავშესაფრის მთხოვნელთა რიცხვი. „შპიგელის“ თანახმად, 2018 წლის იანვრიდან მარტამდე გერმანიას თავშესაფრის მინიჭების თხოვნით მიმართა 1771-მა ქართველმა. 2017 წელს მათი რიცხვი იყო 601 - თითქმის სამჯერ ნაკლები. გამოცემა აღნიშნავს, რომ 2017 წლის მარტის ბოლოს საქართველოს მოქალაქეებისათვის ევროკავშირში უვიზო რეჟიმის შემოღების შემდეგ, თავშესაფრის მთხოვნელთა რიცხვი გაიზარდა ევროპის სხვა ქვეყნებშიც, მათ შორის საფრანგეთში, შვედეთსა და იტალიაში მიუხედავად იმისა, რომ ძალიან მცირეა თავშესაფრის მოპოვების შანსი. „შპიგელს“ მოჰყავს ექსპერტების შეფასება, რომ საქართველოს მოქალაქეთა ევროკავშირის ქვეყნებში დამკვიდრების მცდელობის მთავარი მიზეზებია უმუშევრობა და სიღარიბე. გამოცემას მოჰყავს ბოლო მონაცემები ერთ სულ მოსახლეზე მთლიანი შიდა პროდუქტის შესახებ: ის საქართველოში თვეში 280-მდე ევროს შეადგენს, ხოლო გერმანიაში - 3300 ევროს. სტატიაში აღნიშნულია ასევე, რომ ევროკავშირში შესაძლოა იმსჯელონ უვიზო რეჟიმის შეჩერების მექანიზმის ამოქმედებაზე და რომ გერმანიის შინაგან საქმეთა სამინისტრო მხარს უჭერს საქართველოს აღიარებას „უსაფრთხო ქვეყნად“, რაც გააადვილებს თავშესაფრის მაძიებლებისათვის უარის თქმასა და საქართველოში მათი გაგზავნის პროცესს.
