ტაჯიკეთში დააკავეს ხუთი პირი უცხოელი ველოსიპედისტების მკვლელობასთან კავშირში ეჭვმიტანით
ტაჯიკი ოფიციალური პირების განცხადებით, დაკავებულია ხუთი მამაკაცი 29 ივლისს ოთხი უცხოელი ველოსიპედისტის მკვლელობასთან კავშირში ეჭვმიტანით. ამასთან, დაკითხვას უპირებენ რუსეთში მყოფ 20 ტაჯიკ მიგრანტს. ტაჯიკეთის პოლიციის 16 აგვისტოს ცნობით, ხუთი მამაკაცი გასულ კვირაში დააკავეს ნორაკში - ეჭვმიტანილებიდან ორი პირის მშობლიურ ქალაქში. 29 ივლისს ავტომანქანა დაეჯახა უცხოელ ველოსიპედისტებს, რის შემდეგაც მანქანიდან ჩასულმა თავდამსხმელებმა ცივი იარაღი გამოიყენეს მათ წინააღმდეგ. მოკლულ იქნენ ორი ამერიკელი, ერთი შვეიცარელი და ერთი ჰოლანდიელი, დაჭრილია სამი უცხოელი. თავდასხმაზე პასუხისმგებლობა იკისრა ექსტრემისტების გაერთიანება „ისლამურმა სახელმწიფომ“. მან გამოაქვეყნა ვიდეო, რომელზეც ნაჩვენებია, როგორ გამოხატავს ხუთი კაცი „ისლამური სახელმწიფოს“ მიმართ მხარდაჭერას. მაგრამ ტაჯიკეთის მთავრობა ამტკიცებს, რომ ხუთი მამაკაცი არის აკრძალული ორგანიზაციის, "ტაჯიკეთის ისლამური აღორძინების პარტიის" წევრი. დუშანბე ამ ორგანიზაციას ადანაშაულებს თავდასხმაში.