ლევან იზორია: აფხაზებსა და ოსებს საქართველო მშვიდობასა და განვითარებას სთავაზობს

თავდაცვის მინისტრის, ლევან იზორიას განცხადებით, აფხაზებისა და ოსების ინტეგრირების მიმართულებით „ძალიან მშვიდობიანი და პრაგმატული“ პოლიტიკით ხელმძღვანელობს. თავდაცვის მინისტრმა განცხადება გააკეთა 18 აგვისტოს, მას შემდეგ, რაც ყვავილებით შეამკო საქართველოს ეროვნული გმირის, აგვისტოს ომის დროს ცხინვალში წამებით მოკლული გიორგი ანწუხელიძის საფლავი, მუხათგვერდის ძმათა სასაფლაოზე.

„ამ მშვიდობიანი პოლიტიკის მთავარი მამოძრავებელი გახლავთ ჩვენი გაძლიერება და განვითარება, რაც უნდა იყოს წინაპირობა ჩვენი თანაცხოვრების, რაც უნდა იყოს წინაპირობა აფხაზებისთვის და ოსევისთვის საქართველოს ფარგლებში განვითარებისა. სწორედ ამას ემსახურება მთავრობის მიერ წარდგენილი გეგმა „ნაბიჯი უკეთესი მომავლისთვის", რომელიც სთავაზობს ყველ სერვისს ჩვენს თანამოქალაქე აფხაზებსა და ოსებს. ასე რომ, ამ პოლიტიკის ფარგლებში, რასაკვირველია, ყოველთვის მზად ვართ დიალოგისთვის და ამ მშვიდობიანი პოლიტიკის გამყარებისთვის“, - განაცხადა ლევან იზორიამ, აფხაზეთის დე ფაქტო რესპუბლიკის პარლამენტის დეპუტატის, სერგეი შამბას ინიციატივის საპასუხოდ.

თავდაცვის მინისტრის თქმით, ოკუპირებულ ტერიტორიებზე რუსეთს აქვს მაქსიმალური კონტროლი და რეალობაა, რომ „გადაწყვეტილებების მიღება მხოლოდ აფხაზი და ოსი ხალხის ნებით არ ხდება“. შესაბამისად, დიალოგისთვის განიხილავს მხოლოდ საერთაშორისო ფორმატებს, რათა რუსეთს მაქსიმალურად მოეთხოვოს საერთაშორისო სამართლით დადგენილი ნორმების შესრულება.

აფხაზეთის დე ფაქტო რესპუბლიკის ყოფილმა ე.წ. პრემიერ-მინისტრმა და დე ფაქტო პარლამენტის ე.წ. დეპუტატმა, სერგეი შამბამ „ეხო მოსკვისთვის“ მიცემულ ინტერვიუში განაცხადა, რომ დგება დრო, როდესაც საჭიროა ურთიერთობების დალაგება, დიალოგის დაწყება და საქართველოსთან საერთო მომავალზე ფიქრი „იმ გაგებით, რომ ჩვენ მეზობელი ხალხები ვართ.“