ტრამპი განიხილავს სადამსჯელო ნაბიჯებს რუსეთის შესახებ გამოძიებასთან დაკავშირებული ოფიციალური პირის მიმართ
აშშ-ის პრეზიდენტი, დონალდ ტრამპი ამბობს, რომ აპირებს "ძალიან სწრაფად" იმოქმედოს საიმისოდ, რომ სტატუსი მოეხსნას იუსტიციის სამინისტროს მუშაკს, რომელსაც ურთიერთობა აქვს ტრამპის რუსეთთან კავშირების შესახებ სკანდალური დოსიეს ავტორ ფირმასთან. ტრამპმა 17 აგვისტოს ტვიტერით დაწერა, "სირცხვილია", რომ ბრუს ოჰრი სამინისტროში მუშაობსო. ეს არის მორიგი ნიშანი, რომ ტრამპი მიზანში იღებს სამართალდამცავ სტრუქტურებში მომუშავე პირებს, რომლებიც მონაწილეობენ სამინისტროს მიერ წარმოებულ გამოძიებაში რუსეთის ჩარევის შესახებ მის 2016 წლის საპრეზიდენტო კამპანიაში. 15 აგვისტოს ტრამპმა დოკუმენტებთან წვდომის უფლების შემცველი სტატუსი ჩამოართვა CIA-ს ყოფილ დირექტორს, ჯონ ბრენანს - მისი თქმით, ეს ნაბიჯი "გაყალბებული" გამოძიების საწინააღმდეგოდ გადადგა. თავად ბრენანი და ტრამპის სხვა კრიტიკოსები ამას შურისძიების აქტად მიიჩნევენ. ოჰრი ტრამპის ყურადღების ცენტრში მოექცა მისი კონტაქტების გამო გლენ სიმპსონთან, თანადამაარსებელთან კომპანიისა Fusion GPS, რომელმაც 2016 წელს დაიქირავა ბრიტანეთის ყოფილი ჯაშუში, კრისტოფერ სტილი ტრამპის რუსეთთან კავშირების შესახებ დოსიეს შესაქმნელად. არის ცნობები, რომ ოჰრს სტილთან კავშირი ჰქონდა ამ დოსიეს შესახებ, რომელიც შეიცავდა დოკუმენტურად გაუმყარებელ და საჯაროდ გამოუქვეყნებელ ბრალდებებს, რომლებიც სამინისტროს არ გაუზიარებია. ოჰრის ცოლი, ნელი, კამპანიის დროს ასევე Fusion GPS-ში მუშაობდა - რასაც ტრამპი მიიჩნევს ერთ-ერთ დასტურად, რომ რუსეთის შესახებ გამოძიება პოლიტიკურადაა მიკერძოებული მის საწინააღმდეგოდ.