თამარ ხულორდავა: “ჩვენ გვყავს სპილო ოთახში, რომელსაც ვერაფრით ააცილებ თვალს“
“ევროკავშირის საზღვრებიც მოვიდა ჩვენამდე, მაგრამ ყველაზე დიდი პრობლემა არის, რომ ვეღარავინ გაიგო რა მოუხერხოს იმას, რომ რუსეთი არის ძალიან მნიშვნელოვანი მოთამაშე და მას აქვს თავისი გავლენის სფეროები, რომლის დათმობაც არ სურს. მისი სტრატეგია არის, რომ მოახდინოს ამ რეგიონის დესტაბილიზაცია და შეინარჩუნოს პრობლემები. რუსეთს სურს პრობლემური სტატუს კვო შეინარჩუნოს, რადგან ეს მას აძლევს ხელს“,- განაცხადა საქართველოს, მოლდოვას და უკრაინის საპარლამენტთაშორისო ასამბლეის საინაუგურაციო პლენარულ სესიაზე სიტყვით გამოსვლისას საქართველოს პარლამენტის ევროპასთან ინტეგრაციის კომიტეტის თავმჯდომარემ, თამარ ხულორდავამ. მისი თქმით, შავი ზღვის რეგიონში არიან ქვეყნები, რომლებიც ევროპისკენ მიდიან, მაგრამ „ჩვენ ასევე გვყავს სპილო ოთახში, რომელსაც ვერაფრით ააცილებ თვალს“. მან კმაყოფილება გამოთქვა იმით, რომ სამმხრივ დღის წესრიგში რეგიონის უსაფრთხოების პრობლემებსა და გამოწვევებზე მსჯელობის იდეა რეალიზებულია.
„შავი ზღვის არეალი არის უნიკალური და იძლევა ბევრ შესაძლებლობას. ჩვენ უნდა დავიწყოთ მეტი ფიქრი, თუ როგორ უნდა ვიმუშაოთ როგორც რეგიონმა“, - აღნიშნა თამარ ხულორდავამ. 5-6 ოქტომბერს, თბილისში, საქართველოს, მოლდოვას და უკრაინის საპარლამენტთაშორისო ასამბლეის საინაუგურაციო პლენარული სესია იმართება.
საქართველოს, მოლდოვას და უკრაინის საპარლამენტთაშორისო ასამბლეა ქვეყნებს შორის თანამშრომლობისა და დიალოგის კიდევ უფრო გაღრმავებას, საპარლამენტთაშორისო ურთიერთობების გაძლიერებას, ასევე, სამმხრივ ინტერესებში შემავალი საკითხების განხილვას ისახავს მიზნად. დადგენილების პროექტი „საქართველოს პარლამენტის, მოლდოვის რესპუბლიკის პარლამენტისა და უკრაინის ვერხოვნა რადას საპარლამენტო ასამბლეის შექმნის თაობაზე“ საქართველოს პარლამენტმა 21 სექტემბერს მიიღო.