პარიზში 133 ადამიანი დაშავდა საპროტესტო გამოსვლების დროს
პარიზის პოლიციის ცნობით, 133 ადამიანი დაშავდა და 412 ადამიანი დააკავეს გადასახადებისა და ხარჯების ზრდის გასაპროტესტებლად გამართულ აქციებზე. აქციები საფრანგეთის სხვა ქალაქებშიც გაიმართა.
ასევე პარიზის პოლიციის თანახმად, 1 დეკემბრის გამოსვლებზე დაშავებულებს შორის არის 23 პოლიციელი. დაკავებულებიდან 378 ადამიანი პოლიციის განყოფილებებში რჩება. მანამდე ძალადობრივმა პროტესტმა მოიცვა ცენტრალური პარიზის ნაწილი. როგორც იუწყებიან, დემონსტრანტებმა ქუჩებში ბარიკადები აღმართეს, ქვები დაუშინეს პოლიციელებს. ხოლო პოლიციამ ცრემლმდენი გაზი და წყლის ჭავლი გამოიყენა. საჭირო გახდა მეტროს10-ზე მეტი სადგურის დახურვა.
საფრანგეთის პრეზიდენტმა ემანუელ მაკრონმა პრემიერ-მინისტრი და შინაგან საქმეთა მინისტრი მიიწვია საგანგებო სხდომაზე, რომელიც კვირას გაიმართება და უსაფრთხოების საკითხებს მიეძღვნება. მაკრონის განმარტებით, საწვავზე გადასახადების მატება არის ერთ-ერთი ზომა გლობალური დათბობის წინააღმდეგ.
საფრანგეთის მედიის ცნობით, მთელი ქვეყნის მასშტაბით საპროტესტო აქციებში მონაწილეობდა 75 000-მდე ადამიანი.