ტაილანდში პირობითი სასჯელი შეუფარდეს "რიბკაგეიტის" სკანდალით ცნობილ ნასტია რიბკას
ტაილანდში სასამართლომ პირობითი სასჯელი შეუფარდა ბელორუს მოდელ ანასტასია ვაშუკევიჩს, რომელიც ცნობილია ფსევდონიმით ნასტია რიბკა, და პიროვნული განვითარების მწვრთნელს, რუსეთის მოქალაქე ალექსანდრ კირილოვს (ფსევდონიმით ალექს ლესლი).
ისინი გაასამართლეს სექსუალური ხასიათის მომსახურების უკანონოდ ორგანიზების ბრალდებით.
ორივემ თავი დამნაშავედ სცნო. სექს-მომსახურების საქმეზე მათთან ერთად გაასამართლეს კიდევ ექვსი ადამიანი - ისინიც ბელორუსიისა და რუსეთის მოქალაქეები. ცნობების თანახმად, მალე მოხდება ტაილანდიდან ყველა ამ პირის დეპორტაცია. გამოცემა The Bell-ის თანახმად, ნასტია რიბკა და ალექს ლესლი შეეცდებიან, არ მოხვდნენ ბელორუსიასა და რუსეთში. ამის შესახებ გამოცემას უთხრა მათმა მეგობარმა, გრიგორი კოგანმა.
რიბკა და ლესლი 2018 წელს დააკავეს ტურისტებისათვის სექსში ტრენინგების ჩატარებისათვის. მათ ჯერ უკანონო მეწარმეობის ბრალდება წაუყენეს, რასაც მათი გამართლება მოჰყვა. ამის მერე წაუყენეს მათ სექს-მომსახურების ბრალდება.
ტაილანდში დაკავებამდე ნასტია რიბკა გახვეული იყო „რიბკაგეიტის“ სკანდალში, რომელიც შევიდა რუსი ოპოზიციონერის, ალექსეი ნავალნის ერთ-ერთ ანგარიშში. ანგარიში, კერძოდ, ასახავს 2016 წლის აგვისტოში ოლიგარქ ოლეგ დერიპასკასა და ვიცე-პრემიერ სერგეი პრიხოდკოს შეხვედრას. „ნასტია რიბკად“ წოდებულმა ახალგაზრდა ქალმა სოციალურ ქსელში გამოაქვეყნა შეხვედრის ამსახველი ვიდეო- და ფოტომასალა, რომელიც თან ერთვის ალექსეი ნავალნის ანგარიშს.