DFRLab: პრორუსული ძალები საქართველოში ანტი-თურქულ განწყობებს აღვივებენ
გავლენიან ონლაინ-მედია პლატფორმა“ მედიუმმა“ გამოაქვეყნა სტატია საქართველოში მომძლავრებული ანტი-თურქული სენტიმენტების შესახებ და ამ განწყობების გავრცელების უკან პრორუსული გამოცემების კვალის შესახებ.
სტატიის ავტორად დასახელებულია ატლანტიკური საბჭოს Digital Forensic Research Lab - დეზინფორმაციასთანმებრძოლი ორგანიზაცია.
ლაბორატორია მკითხველს ჯერ კონტექსტს აწვდის - რომ თურქეთსა და საქართველოს შორის მძლავრი ეკონომიკური, დიპლომატიური და სტრატეგიული კავშირები არსებობს. თურქეთი საქართველოს ერთადერთი მეზობელია, რომელთანაც საზღვრის ასი პროცენტია დემარკირებული. ორი ქვეყანა უახლოესი სტრატეგიული პარტნიორები არიან და ამან პრორუსული ძალების ყურადღება მიიქცია, რომლებიც ამ ურთიერთობის გაფუჭებას ცდილობენო.
სტატიაში ნათქვამია, რომ ბოლო თვეების განმავლობაში საქართველოში გააქტიურდა ნარატივი „თურქეთის ექსპანსიის“ შესახებ და პრორუსულად განწყობილი მედიასაშუალებები და „ფეისბუკზე“ არსებული ულტრა-მემარჯვენე ჯგუფები ცდილობენ თურქეთი საქართველოსთვის უდიდეს საფრთხედ წარმოაჩინონ. ძირითადი თემები ასეთია - რომ თურქეთს შორს საქართველოსთვის აჭარის წართმევა, რომ თურქი ინვესტორები იპყრობენ საქართველოს ეკონომიკას და რომ ქართული ქალაქები თურქმა ტურისტებმა წალეკეს.
ლაბორატორია განსაკუთრებით დიდ ყურადღებას უთმობს კონსპირაციის თეორიას, რომლის მიხედვითაც ყარსის ხელშეკრულებას ვადა გასდის (სინამდვილეში ხელშეკრულება უვადოა) და 2021 წელს თურქეთი ბათუმს დაეპატრონება.
ეს სიყალბე სათავეს, როგორც წესი, იღებს „სამხედრო ექსპერტ“ ჯეფრი სილვერმანის კომენტარებისგან. სილვერმანი კრემლთან დაკავშირებული ონლაინ გამოცემა Veterans Today-ის ქართული ბიუროს ხელმძღვანელია და მის მოსაზრებებს (მაგალითად, რომ ღორის გრიპს „ლუგარის ლაბორატორია“ ავრცელებს) ხშირად იყენებს ქართული პრესა.
ამას ემატება მოულოდნელად, ერთ დღეში გაჩენილი ონლაინ-გამოცემები, რომლებიც თავიანთი წარმოშობის შესახებ ინფორმაციას არ ასაჯაროებენ და თარგმნიან რუსული მედიის ცნობებს იმის შესახებ, რომ „აჭარელი მუსლიმები იარაღით ხელში აპირებენ დამოუკიდებლობის მოპოვებას“.
ამას ემატება „იუტუბის“ არხები, რომლებიც რაღაც ხერხებით ერთ კვირაში ათიათასობით ხელმომწერს იჩენენ და სადაც „საქართველოს თურქულ პრობლემაზე“ ლაპარაკობენ.
ამ გამოცემების სტატიებს და „იუტუბის“ ვიდეოებს კი შემდეგ „ფესიბუკზე“ ულტრა-მემარჯვენე გვერდები აზიარებენ- ანტი-ლგბტ და ანტი-ევროპული პოსტების გვერდით.
ლაბორატორიის კვლევის მიხედვით თურქეთის ნეგატიურ კონტექსტში მოხსენიება რამდენიმე წლის წინ დაიწყო, თუმცა, განსაკუთრებით 2019 წლის ივნისიდან გააქტიურდა.
„ანტი-თურქული ნარატივების გავრცელებას სხვადასხვა მედია-პლატფორმებზე შეუძლია საქართველოში ანტი-თურქული განწყობების გაღვივება, რაც, თავის მხრივ, საზოგადოების ყურადღებას გადაიტანს კრემლიდან მომავალი საფრთხიდანო“ - ნათქვამია სტატიაში.