ჯერჯერობით უცნობია საოკუპაციო ძალების მიერ დაკავებული საქართველოს შვიდი მოქალაქის ადგილსამყოფელი
საოკუპაციო ხაზთან, სოფლების - აძვისა და ახალუბნის სიახლოვეს, რუსეთის მესაზღვრეებმა დააკავეს საქართველოს შვიდი მოქალაქე: გერკეული, ნასყიდაშვილი, ელიაური, ბაინდურაშვილი, ვარდანაშვილი, გერკეული და მიღრიჯანაშვილი. დაკავებულები სოფელ ახალუბნის მცხოვრებლები არიან.
ინფორმაციას ადასტურებს გორის მუნიციპალიტეტის მერია. როგორც გორის ვიცე-მერმა, ერასტი ელიჯარაშვილმა უთხრა რადიო თავისუფლებას, დაკავებულთა ოჯახის წევრების თქმით, ახალგაზრდები ნასვამ მდგომარეობაში გაემართნენ წმინდა გიორგის სახელობის ეკლესიაში, რომელიც საოკუპაციო ხაზთან მდებარეობს. ნაპოვნია დაკავებულთა ავტომანქანა, რომლის კონფისკაცია საოკუპაციო ძალებს არ მოუხდენიათ.
როგორც ვარაუდობენ, დაკავებულებს არცევში რუსეთის სამხედრო ბაზაზე დაკითხვის შემდეგ გადაიყვანენ ცხინვალში, სადაც მათი სასამართლო გაიმართება.
ამოქმედებულია ევროკავშირის სადამკვირვებლო მისიის ცხელი ხაზი. პარლამენტის თავმჯდომარის, არჩილ თალაკვაძის თქმით, ხელისუფლება „ყველაფერს ვაკეთებთ, რომ რაც შეიძლება მოკლე დროში დავადგინოთ მათი ადგილსამყოფელი და დავუბრუნოთ ისინი ოჯახებს“.