ყვარელში ხანძარი უკვე ლოკალიზებულია
ყვარლის მუნიციპალიტეტში, ახალსოფელში ხანძარი ლოკალიზებულია, - ამის შესახებ იტყობინება შინაგან საქმეთა სამინისტროს საგანგებო სიტუაციების მართვის სამსახური.
კახეთის გუბერნატორის, ირაკლი ქადაგიშვილის თქმით, უკვე ლოკალიზებულია ხანძრის ყველა ეპიცენტრი და უკვე შესაძლებელია, რომ დაიწყოს ცეცხლის ლიკვიდაციის ეტაპი. ქადაგიშვილი იმყოფება ადგილზე მოქმედ საგანგებო შტაბში, რომელსაც საგანგებო სიტუაციების მართვის სამსახურის უფროსი თემურ მღებრიშვილი ხელმძღვანელობს.
დღის მეორე ნახევარში ყვარლის მუნიციპალიტეტში, ახალსოფლის ტყეში გაჩენილი ხანძრის ჩაქრობის პროცესში თავდაცვის სამინისტროს მუხლუხოიანი სახანძრო ტექნიკა ჩაერთო.
როგორც შინაგან საქმეთა სამინისტროს საგანგებო სიტუაციების მართვის სამსახურში უთხრეს რადიო თავისუფლებას, ცეცხლის ჩაქრობის პროცესი გამთენიისას განაახლა სასაზღვრო პოლიციის სამმა ვერტმფრენმა. ასევე, მთელი ღამის განმავლობაში შს სამინისტროს საგანგებო სიტუაციების მართვის სამსახურის მეხანძრე-მაშველები აგრძელებდნენ ცეცხლის კერებზე მუშაობას და სპეციალური ტექნიკის საშუალებით მიმდინარეობდა გზის გაყვანა ტყეში, ცეცხლის ღია კერებთან სახანძრო-სამაშველო ტექნიკის მისაყვანად.
ყვარლის მუნიციპალიტეტში, სოფელ ახალსოფლის ტყეში ცეცხლი ხეებსა და ხმელ ბალახს 23 აგვისტოს გაუჩნდა. არსებული ინფორმაციით, ხანძრის შედეგად დამწვარია 10 ჰექტარამდე ტერიტორია.