ბეირუთში ორი დრონით თავდასხმა განხორციელდა ჰეზბოლას ობიექტებზე
ლიბანის არმიის თანახმად, ისრაელმა ორი უპილოტო აპარატით თავდასხმა განახორციელა ჰეზბოლას საყრდენ ობიექტებზე, სამხრეთ ბეირუთში. ირანის მხარდაჭერით მოქმედმა შიიტურმა ორგანიზაციამ, ჰეზბოლამ, გამოაცხადა, რომ საჰაერო თავდასხმისას დაზიანდა მედიაცენტრი.
ორმა საჰაერო აპარატმა დაარღვია ლიბანის საჰაერო სივრცე საღამოს, 25 აგვისტოს, ლიბანის დედაქალაქის სამხრეთ გარეუბანში, იტყობინება ლიბანის არმია და დასძენს, რომ ერთი დრონი ჩამოვარდა, მეორე კი აფეთქდა ჰაერში და მატერიალური ზარალი გამოიწვია. ჰეზბოლას წარმომადგენელმა, მოჰამად აფიფმა განაცხადა, რომ ორივე დრონი იარაღით იყო აღჭურვილი და აფეთქებამ დიდი ზარალი მიაყენა მედიაცენტრს.
ისრაელის ოფიციალურ პირებს კომენტარი თავდასხმის თაობაზე არ გაუკეთებიათ. ისრაელმა რამდენიმე საათით ადრე გამოაცხადა, რომ მეზობელ სირიაში დრონების საშუალებით ირანის ძალებს მიაყენა დარტყმა, რათა თავიდან აეცილებინა მათი მოსალოდნელი თავდასხმა.
ისრაელი არმიის თქმით, 24 აგვისტოს თავდასხმის სამიზნე იყო ირანის ელიტარული „ყუდის ძალები“, ირანის რევოლუციური გვარდიის კორპუსის უცხოეთის ჯარის ნაწილები, რომლებიც განლაგებული არიან აყრაბაში, დმასაკიდან სამხრეთ-აღმოსავლეთში.
ირანის რევოლუციური გვარდიის კორპუსმა თავდასხმის შესახებ ინფორმაცია უარყო.
ისრაელმა სირიაში ასობით დარტყმა განახორციელა, როგორც თვითონ აცხადებს, ირანის ობიექტებსა და მისი მოკავშირეებზე, ჰეზბოლას ჩათვლით.