ყვარელი: ხანძართან ბრძოლაში თავდაცვის სამინისტროს ტექნიკა ჩაერთო
ყვარლის მუნიციპალიტეტში, ახალსოფლის ტყეში გაჩენილი ხანძრის ჩაქრობის პროცესში თავდაცვის სამინისტროს მუხლუხოიანი სახანძრო ტექნიკა ჩაერთო. ამის შესახებ შინაგან საქმეთა სამინისტროს საგანგებო სიტუაციების მართვის სამსახურში აცხადებენ.
პარალელურად, მუშაობას განაგრძობს სასაზღვრო პოლიციის სამი ვერტმფრენი. წყლის მარაგის შესავსებად ვერტმფრენები სოფელ ზინობიანის ტბას იყენებენ.
„სამი ვერტმფრენი გათენებიდან მუშაობს და ასევე,მთელი ღამის განმავლობაში შს სამინისტროს საგანგებო სიტუაციების მართვის სამსახურის მეხანძრე-მაშველები აგრძელებდნენ ცეცხლის კერებზე მუშაობას. ასევე, სპეციალური ტექნიკის საშუალებით მიმდინარეობს ტყეში გზის გაყვანა ღია კერებთან სახანძრო-სამაშველო ტექნიკის მისასვლელად“, - უთხრეს რადიო თავისუფლებას აცხადებს საგანგებო სიტუაციების მართვის სამსახური.
უწყება რადიო თავისუფლებასთან არ ადასტურებს ინფორმაციას ცეცხლის ახალი კერების გაჩენის შესახებ და ასევე აცხადებს, რომ ამ ეტაპზე არ არის საფრთხე. რომ ცეცხლმა დასახლებულ პუნქტებამდე მიაღწიოს. ადგილზე მუშაობს საგანგებო შტაბი, რომელსაც საგანგებო სიტუაციების მართვის სამსახურის უფროსი თემურ მღებრიშვილი ხელმძღვანელობს.
ყვარლის მუნიციპალიტეტში, სოფელ ახალსოფლის ტყეში ცეცხლი ხეებსა და ხმელ ბალახს 23 აგვისტოს გაუჩნდა. არსებული ინფორმაციით, ხანძრის შედეგად დამწვარია 10 ჰექტარამდე ტერიტორია.