რეგიონული ოფისი: განადგურებულია სევეროდონეცკთან დამაკავშირებელი ყველა ხიდი, ადამიანები უმძიმეს პირობებში რჩებიან

აღმოსავლეთ უკრაინის ქალაქ სევეროდონეცკთან დამაკავშირებელი ყველა ხიდი განადგურებულია, და ქალაქში ადამიანები "ძალიან რთულ" ვითარებაში რჩებიან - უთხრა ლუგანსკის ოლქის სამხედრო ადმინისტრაციის ხელმძღვანელმა რადიო თავისუფლებას.


"ყველა ხიდი განადგურებულია და, სამწუხაროდ, ქალაქში რაიმეს ჩატანა შეუძლებელია" - ამბობს სერჰეი გაიდაი და დასძენს, რომ ევაკუაციის პროცესი არ ხერხდება. მისი თქმით, რუსეთის ძალებმა გაანადგურეს გაზის, წყლის და ელექტროენერგიის მთელი ინფრასტრუქტურა, რაც "უზარმაზარ პრობლემებს" უქმნის სამედიცინო სერვისებს.


გაიდაის თქმით, რუსეთის არმია ამჟამად აკონტროლებს სევეროდონეცკის 70-დან 80 პროცენტს - ანუ დონბასის ქალაქის, სადაც ინტენსიური შეტაკებები განვითარდა უკრაინის და რუსეთის ძალებს შორის.


სეპარატისტთა ერთ-ერთმა ლიდერმა, ედუარდ ბასურინმა მანამდე თქვა, რომ სევეროდონეცკი "დე ფაქტო" ბლოკირებულია, მას შემდეგ, რაც რუსეთის ძალებმა ააფეთქეს უკანასკნელი ხიდი, რომელიც მას აკავშირებდა მდინარე ჩრდილოეთის დონეცის გაღმა მდებარე ქალაქ ლისიჩანსკთან.


უკრაინის გენერალური შტაბი მანამდე აცხადებდა, რომ რუსეთის ძალებმა პოზიციები მოიპოვეს ბოგოროდიჩნოეში - სოფელში, რომელიც მდებარეობს სევეროდონეცკიდან დასავლეთით, 50-მდე კილომეტრის მოშორებით. ბოგოროდიჩნოეს დაკავება რუსეთის ძალებს უპირატესობას აძლევს საიმისოდ, რომ მათ შეტევა მიიტანონ სლოვიანსკზე - უფრო დიდ და მნიშვნელოვან ქალაქზე. ბასურინი ამბობს, რომ მოსკოვის მიერ მხარდაჭერილმა ძალებმა უკვე დაიწყეს სლოვიანსკზე თავდასხმა.