ომისგან უკრაინის ინფრასტრუქტურას 108 მილიარდი დოლარის ზარალი მიადგა
რუსეთმა უკრაინის ინფრასტრუქტურას 108 მილიარდი დოლარის ზიანი მიაყენა, რომლის რესტავრაციისთვისაც, კიევის ეკონომიკის სკოლის კვლევის თანახმად, მინიმუმ 185 მილიარდი დოლარი იქნება საჭირო.
კვლევის მიხედვით, ზარალის საერთო რაოდენობაში ყველაზე დიდი წილი დაზიანებულ ან განადგურებულ -129.9 ათას საცხოვრებელ კორპუსს უკავია. აქედან 114,7 ათასი კერძო სახლია,ხოლო 15,1 ათასი-მრავალბინიანი. უკრაინის თავდაცვის სამინისტროს მონაცემები კიდევ უფრო მეტია-მინიმუმ 140 ათასი განადგურებული საცხოვრებელი სახლი.
მეორე ადგილზეა ინფრასტრუქტურის სექტორი. აქ ზარალი 31,6 მილიარდ დოლარად შეფასდა. მესამე ადგილზეა მრეწველობა, ზარალის ოდენობა 8.8 მილიარდი დოლარია.
ზოგადად, კიევის ეკონომიკის სკოლის თანახმად, 24 თებერვლიდან რუსეთმა დააზიანა, გაანადგურა ან ხელთ იგდო: 388 საწარმო; 43,7 ათასი ერთეული სასოფლო-სამეურნეო ტექნიკა; 1991 მაღაზია; 511 ადმინისტრაციული შენობა; 18 სამოქალაქო აეროპორტი; 105,2 ათასი სამგზავრო მანქანა; 764 საბავშვო ბაღი; 634 კულტურული ობიექტი; 27 სავაჭრო ცენტრი; 28 საწვავის საწყობი.
2022 წლის 13 ივნისიდან დოკუმენტირებული ზარალის საერთო ოდენობა 12.8 მილიარდი დოლარით გაიზარდა.