რუსი მსახიობი ვლადიმერ მაშკოვი კოლეგებს მიმართავს: თუ რუსეთიდან წათრევა გსურთ, წაეთრიეთ

რუსი მსახიობი, ვლადიმერ მაშკოვი ყირიმის ფესტივალზე Таврида  იმყოფებოდა, სადაც  შემოქმედებითი საღამო გამართა.  მან ისაუბრა იმ ადამიანებზე, ვინც რუსეთს უკრაინაში მიმდინარე ომის გამო ტოვებს, თუმცა სიტყვა “ომი” მას არც უხსენებია და კვლავაც სპეცოპერაციად მოიხსენია.

დიდებული ქვეყნის დატოვება და სხვა ქვეყანაში გამგზავრება, სადაც თქვენ არავინ გელით – ეს ჩავარდნაა. არც ვაპირებ და არც მსურს ასე შევცვალო საკუთარი ცნობიერება. ბიჭებო, თუ თქვენ აქედან წათრევა გსურთ, წაეთრიეთ! მაგრამ, მე მინდა ვიცხოვრო ჩემს რთულ ლინგვისტურ სისტემაში და რთულ ადამიანებთან ერთად. რუსული ენა ყველაზე მდიდარი, ყველაზე მგრძნობიარე ენაა. ჩვენი სიტყვა უნიკალურია. ხოლო, ხელოვანებმა, იმისათვის რომ საზღვარგარეთ იმუშაონ  რუსული სიტყვა უნდა დაივიწყონ.

ქალიშვილ, მარია მაშკოვასთან კონფლიქტის შესახებ მსახიობმა ჟურნალისტებს უპასუხა:

არ მინდა ამაზე საუბარი.

შეგახსენებთ, რომ მარია მაშკოვამ CNN-თან ინტერვიუში განაცხადა: მამამ მთხოვა, სასწრაფოდ დავბრუნებულიყავი რუსეთში  ქალიშვილებთან ერთად, ვყოფილიყავი კარგი რუსი, მეთხოვა პატიება ღალატის გამო და რუსი ხალხის გვერდით დავმდგარიყავი, მათთან ერთად მებრძოლა “უკრაინული ნაციზმის” წინააღმდეგ.  შეგახსენებთ, რომ თავად ვლადიმერ მაშკოვმა მხარი დაუჭირა დონეცკისა და ლუგანსკის აღიარებასა და უკრაინაში შეჭრას.  2018 წელს ვლადიმერ მაშკოვი რუსეთის პრეზიდენტის ნდობით აღჭურვილი პირი იყო, შარშან კი არჩევნებში მიიღო მონაწილეობა Единая Россия-ს პარტიის სიით.

წყარო spletnik.ru