პარლამენტში ბიუროს სხდომაზე არ შეუშვეს ოპოზიციონერი დეპუტატების ნაწილი
პარლამენტში ბიუროს სხდომის პარალელურად ოპოზიციონერ დეპუტატებს დერეფნებში გადაადგილება შეზღუდული აქვთ. ოთხი დეპუტატი, მათ შორის გიორგი ვაშაძე, პაატა მანჯგალაძე, ანი წითლიძე და გიორგი ბოტკოველი სხდომაზე არ შეუშვეს. ისინი არ არიან ბიუროს წევრები, თუმცა ამბობენ, რომ როგორც პარლამენტის წევრებს, დასწრების უფლება აქვთ.
ბიუროს დარბაზამდე მისასვლელი ყველა შესაძლო გზა დაცვის თანამშრომლებს აქვთ გადაკეტილი. მათ შორის, პარლამენტის ამ სივრცეში გათიშულია ლიფტიც.
ბიუროს დარბაზის წინ მუშაობის შესაძლებლობა არ აქვთ არც ჟურნალისტებს.
სხდომაზე პარლამენტის სპიკერმა შალვა პაპუაშვილმა მადლობა გადაუხადა მანდატურის სამსახურს და ასევე აღნიშნა, რომ მიმდინარე მოვლენების დროს პარლამენტს დამატებით სახელმწიფო დაცვის სპეციალური სამსახურის თანამშრომლები იცავენ. ოპოზიცია აცხადებს, რომ მათი ინფორმაციით, პარლამენტში არიან სახელმწიფო უსაფრთხოების სამსახურის წარმომადგენლები.
პარლამენტის ბიუროს დღევანდელ სხდომაზე დეპუტატები მიმდინარე კვირის დღის წესრიგს განსაზღვრავენ. როგორც უმრავლესობის ლიდერმა მამუკა მდინარაძემ განაცხადა, "აგენტების" შესახებ კანონპროექტების პლენარულ სესიაზე გატანა ხუთშაბათს, 9 მარტს, იგეგმება.
„უცხოელი აგენტების რეგისტრაციის“ და „უცხოური გავლენის გამჭვირვალობის“ შესახებ კანონპროექტები პირველი მოსმენით განსახილველად მზად არის.
საკანონმდებლო ინიციატივით, რომელსაც მხარს უმრავლესობის დანარჩენი წარმომადგენლებიც უჭერენ, "უცხოური გავლენის აგენტებად" უნდა დარეგისტრირდნენ არასამთავრობო ორგანიზაციები და მედიასაშუალებები, რომლებიც დაფინანსების ნაწილს უცხოეთიდან იღებენ.
პარლამენტში ინიციირებული კანონპროექტების ავტორთა მტკიცებით, მათ მიერ მომზადებული ერთი პროექტი ამერიკული კანონის თარგმანია, მეორე კი, გაცილებით ლიბერალური ვარიანტი და ერთადერთი მიზანი გამჭვირვალობის უზრუნველყოფაა.
ე.წ. უცხოეთის აგენტების კანონის მიღებას ეწინააღმდეგებიან სამოქალაქო საზოგადოების და ოპოზიციური პარტიების წარმომადგენლები, რომლებიც აცხადებენ, რომ "ხალხის ძალის" კანონპროექტი არა ამერიკული, არამედ რუსულია. ეს პოზიცია აქვთ საქართველოში შეერთებული შტატების ელჩს და სახელმწიფო დეპარტამენტს.