მამუკა მდინარაძემ "აგენტების შესახებ" კანონპროექტის დღესვე განხილვის წინადადება დააყენა
პარლამენტის პლენარულ სხდომაზე მსჯელობენ, განიხილონ თუ არა დღესვე ე.წ. უცხოეთის აგენტების შესახებ კანონპროექტის "ამერიკული ვერსია". ეს წინადადება საპარლამენტო უმრავლესობის ლიდერმა მამუკა მდინარაძემ წამოაყენა.
"გთავაზობთ დავიწყოთ განხილვა აგენტების ამერიკული კანონის და გავაგრძელოთ ხუთშაბათს იმიტომ, რომ მოესწროს, ელემენტარულად. გადახვევებით და რეგლამენტის უხეშად გამოყენებით არ იყოს ჩაშლა" ,- თქვა მდინარაძემ, რასაც დაეთანხმა პარლამენტის თავმჯდომარე.
კანონპროექტის დღესვე განხილვის წინააღმდეგია ოპოზიცია. სხდომას არ ესწრება "ნაციონალური მოძრაობის" დეპუტატების დიდი ნაწილი, რადგან "ქართული ოცნების" საჯარო განცხადების მიხედვით, ე.წ. აგენტების კანონპროექტები პლენარულ სხდომაზე ხუთშაბათს, 9 მარტს უნდა განეხილათ.
"გუშინ საპარლამენტო უმრავლესობა გამოვიდა უმრავლესობის სხდომიდან და საქართველოში საზოგადოებას უთხრა, რომ კენჭისყრები და განხილვები აგენტების რუსულ კანონზე იქნებოდა ხუთშაბათს. რა გამოვიდა, რომ არა მხოლოდ საზოგადოებას ამცირებთ, არამედ თქვენს სიტყვას გადადიხართ მაშინ, როდესაც დაჩქარებული წესით გამოგაქვთ ეს კანონი განსახილველად. მე ხომ ვზივარ ამ დარბაზში? ანუ რას ეუბნებით კოლეგებს, რომ დარბაზში შემოსვლა არ შეუძლიათ? ეს არის კიდევ ერთი დამცირება ადამიანების, ვინც გარეთ დგას", - თქვა სხდომაზე ხატია დეკანოიძემ.
"პროცედურული ვირეშმაკობა" უწოდა "ქართული ოცნების" წინადადებას დეპუტატმა რომან გოცირიძემ:
"დებატები უნდა გაიმართოს ამ კანონზე და, რა თქმა უნდა, უნდა ესწრებოდეს მთელი ოპოზიცია. თქვენ გააკეთეთ ისე, რომ ამ კანონის განხილვა ჩატარდეს ცარიელ დარბაზში. ესაა პროცედურული ვირეშმაკობა. თქვენი ამოცანაა, აიცილოთ ის ტკივილები, რომელსაც ყოველდღიურად განიცდით".
განახლება: მამუკა მდინარაძის განცხადებიდან მალევე, პარლამენტმა ე.წ. ამერიკული ვერსიის, "უცხოელი აგენტების რეგისტრაციის შესახებ" კანონპროექტის ნაცვლად, დაიწყო „უცხოური გავლენის გამჭვირვალობის შესახებ“ კანონპროექტის განხილვა.
„უცხოელი აგენტების რეგისტრაციის“ და „უცხოური გავლენის გამჭვირვალობის“ შესახებ კანონპროექტები პარლამენტში პირველი მოსმენით განსახილველად მზად იყო, თუმცა "ქართული ოცნების" განცხადებით, მათი განხილვა 9 მარტის პლენარულ სხდომაზე იყო დაგეგმილი.
საკანონმდებლო ინიციატივით, რომელსაც მხარს უმრავლესობის წარმომადგენლები უჭერენ, "უცხოური გავლენის აგენტებად" უნდა დარეგისტრირდნენ არასამთავრობო ორგანიზაციები და მედიასაშუალებები, რომლებიც დაფინანსების ნაწილს უცხოეთიდან იღებენ.
პარლამენტში ინიციირებული კანონპროექტების ავტორთა მტკიცებით, მათ მიერ მომზადებული ერთი პროექტი ამერიკული კანონის თარგმანია, მეორე კი გაცილებით ლიბერალური ვარიანტი და ერთადერთი მიზანი გამჭვირვალობის უზრუნველყოფაა.
ე.წ. უცხოეთის აგენტების კანონის მიღებას ეწინააღმდეგებიან სამოქალაქო საზოგადოების და ოპოზიციური პარტიების წარმომადგენლები, რომლებიც აცხადებენ, რომ "ხალხის ძალის" კანონპროექტი არა ამერიკული, არამედ რუსულია. ეს პოზიცია აქვთ საქართველოში შეერთებული შტატების ელჩს და სახელმწიფო დეპარტამენტს.