თსუ-ის სტუდენტები უნივერსიტეტს "უცხოეთის აგენტების შესახებ" კანონპროექტებზე პოზიციის გამოხატვას სთხოვენ
თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის სტუდენტები და მოძრაობის წევრები უნივერსიტეტის აკადემიურ საბჭოს მიმართავენ განცხადებით და ე.წ. უცხოეთის აგენტების შესახებ კანონპროექტებთან დაკავშირებით პოზიციის გამოხატვას სთხოვენ.
მოძრაობაში "სტუდენტები რუსული კანონის წინააღმდეგ" სჯერათ, რომ კანონპროექტები შინაარსითვე უპირისპირდებიან იმ იდეალებს, რომლებზეც თბილისის სახელმწიფო უნივერსიტეტი 1918 წლიდან დგას.
"ბოლო რამდენიმე დღემ ნათლად დაგვანახა, რომ პროტესტის მსგავსი ფორმები დიდი სიმბოლური დატვირთვის მატარებელია და აძლიერებს ჩვენს ხმას კანონპროექტების წინააღმდეგ. მიგვაჩნია, რომ ახლა დგას გადამწყვეტი მომენტი, როცა სტუდენტების მიმართ აკადემიურ სივრცეებში გამოხატული მხარდაჭერა ყველაზე მნიშვნელოვანია. ამ მიზეზით, სოციალურ და პოლიტიკურ მეცნიერებათა ფაკულტეტის სტუდენტები და მოძრაობის წევრები უნივერსიტეტის აკადემიურ საბჭოს მივმართავთ განცხადებით, რომლითაც ვთხოვთ კანონპროექტთან დაკავშირებით პოზიციის დაფიქსირებას. მოძრაობის წევრებმა ასევე გავაგზავნეთ განცხადება საფაკულტეტო საბჭოს სახელზე იდენტური თხოვნით", - ნათქვამია სტუდენტების საჯარო მიმართვაში.
მათივე თქმით, ვინაიდან მათ წინაშე არსებული პრობლემა ცდება პოლიტიკური მიკუთვნებულობის ფარგლებს და პირდაპირ ეხება მათი და მომავალი თაობების საგანმანათლებლო პერსპექტივებს, თბილისის სახელმწიფო უნივერსიტეტისა და რექტორის, ჯაბა სამუშიას მკაფიო პოზიციონირება ხსენებულ კრიტიკულ საკითხთან დაკავშირებით უდიდესი მნიშვნელობის მატარებელია.
სტუდენტებს მიაჩნიათ, რომ თბილისის სახელმწიფო უნივერსიტეტის მკაფიო პოზიცია ერთთავად გაზრდის სტუდენტების აქტიურობას და შესაძლებელს გახდის პროტესტის მშვიდობიან, კონსტრუქციულ ფარგლებში შენარჩუნებას.
პირველ მარტს საქართველოს პარლამენტის საგარეო ურთიერთობათა კომიტეტის თავმჯდომარეს, ნიკოლოზ სამხარაძეს, ყოფილმა სტუდენტებმა წერილით მიმართეს, რომელშიც სთხოვდნენ, უარი ეთქვა "უცხო ქვეყნის აგენტების" შესახებ კანონპროექტის მხარდაჭერაზე. სტუდენტებმა დეპუტატ ლექტორს ბოიკოტიც გამოუცხადეს.
"უცხოელი აგენტების რეგისტრაციის" და "უცხოური გავლენის გამჭვირვალობის" შესახებ კანონპროექტები პირველი მოსმენით განსახილველად მზად არის. პირველი მოსმენით მას, სავარაუდოდ, 9 მარტს განიხილავენ პლენარულ სხდომაზე.
საკანონმდებლო ინიციატივით, რომელსაც მხარს საპარლამენტო უმრავლესობის წარმომადგენლები უჭერენ, "უცხოური გავლენის აგენტებად" უნდა დარეგისტრირდნენ არასამთავრობო ორგანიზაციები და მედიასაშუალებები, რომლებიც დაფინანსების ნაწილს უცხოეთიდან იღებენ.
პარლამენტში ინიციირებული კანონპროექტების ავტორთა მტკიცებით, მათ მიერ მომზადებული ერთი პროექტი ამერიკული კანონის თარგმანია, მეორე კი გაცილებით ლიბერალური ვარიანტი და ერთადერთი მიზანი გამჭვირვალობის უზრუნველყოფაა.
ე.წ. უცხოეთის აგენტების კანონის მიღებას ეწინააღმდეგებიან სამოქალაქო საზოგადოების და ოპოზიციური პარტიების წარმომადგენლები, რომლებიც აცხადებენ, რომ "ხალხის ძალის" კანონპროექტი არა ამერიკული, არამედ რუსულია. ეს პოზიცია აქვთ საქართველოში შეერთებული შტატების ელჩს და სახელმწიფო დეპარტამენტს.