იოსელიანი: ვაპირებ ვიყო იმ ადამიანის უფლებების დამცველიც, ვინც კვერცხი მესროლა
პარლამენტთან მისულ ახალარჩეულ სახალხო დამცველს, ლევან იოსელიანს, საპროტესტო აქციის მონაწილეებმა კვერცხები ესროლეს და წყალი გადაასხეს.
მათი გაღიზიანება გამოიწვია ლევან იოსელიანის პასუხებმა ჟურნალისტების კითხვაზე, გამოიყენა თუ არა პოლიციამ აქციის მონაწილეების მიმართ არაპროპორციული ძალა.
ლევან იოსელიანმა განაცხადა, რომ პარლამენტთან ის იმისთვის მივიდა, რომ შეაფასოს, გამოიყენეს თუ არა სამართალდამცავებმა არაპროპორციული ძალა:
"სახალხო დამცველის ოფისი ამ ყველაფერზე გააკეთებს შეფასებას", - თქვა მან.
აქციის მონაწილეები ლევან იოსელიანს სთხოვდნენ, უფრო მკაფიოდ და კონკრეტულად შეეფასებინა რუსთაველის გამზირზე განვითარებული მოვლენები.
სანამ სახალხო დამცველი პარლამენტის მიმდებარე ტერიტორიას პოლიციელების დახმარებით დატოვებდა, ჟურნალისტებთან მცირე კომენტარი გააკეთა:
"ვაპირებ ვიყო იმ ადამიანების სახალხო დამცველიც, ვინც წყალი გადამასხა და კვერცხი მესროლა. ველოდი, რომ ვიღაცას არ მოვწონდი და ჩემს მიმართ აგრესია ექნებოდა, მაგრამ მთლად ასეთს არ ველოდი".
რუსთაველის გამზირზე სამართალდამცავებმა აქციის მონაწილეების წინააღმდეგ გამოიყენეს წყლის ჭავლი და ე.წ. "წიწაკის სპრეი".
წინასწარი ინფორმაციით, დაშავებულია ათობით ადამიანი. მათ დაზიანებები ძირითადად სახის არეში აქვთ.
ვრცელდება კადრებიც, რომლებშიც ჩანს, როგორც ასხამენ აქციის მონაწილეებს სპეციალური დანიშნულების რაზმის წევრები "წიწაკის სპრეის" სახეში.
პარლამენტის ვიცე-სპიკერი და პარტია "მოქალაქეების" წევრი ლევან იოსელიანი პარლამენტმა სახალხო დამცველის პოსტზე 7 მარტს აირჩია.
კენჭისყრამდე ცოტა ხნით ადრე, 16-მა არასამთავრობო ორგანიზაციამ განაცხადა, რომ სახალხო დამცველის კანდიდატურის შერჩევის პროცესი წარიმართა საზოგადოების ჩართულობისა და მონაწილეობის გარეშე, რაც შეუსაბამოა ევროკავშირის მე-12 რეკომენდაციასთან, არღვევს გაერთიანებული ერების ორგანიზაციის მიერ მიღებულ „პარიზის პრინციპებს“ და არ იწვევს საზოგადოებრივ ნდობას
ლევან იოსელიანის ომბუდსმენობის კანდიდატად წარდგენამდე, საშემოდგომო სესიის ბოლოს, სახალხო დამცველის შერჩევის მრავალთვიანი პროცესი ჩიხში შევიდა. ჩავარდა 19-ვე კანდიდატი, რომლებსაც დეპუტატები ადამიანის უფლებათა დაცვის კომიტეტის სხდომებზე კითხვებს უსვამდნენ და მათ პოზიციებს უსმენდნენ. კანდიდატებს შორის იყო არასამთავრობო სექტორის მიერ მხარდაჭერილი სამი კანდიდატი, რომლებსაც ოპოზიციის დიდი ნაწილი ემხრობოდა.