გია ხუხაშვილი: ვიქტორ ყიფიანს შეიძლება ჰქონდეს პოლიტიკური ინტერესი, ბუნებრივია, ეს ივანიშვილთან იქნება შეთანხმებული
„ქართული ოცნების“ დამფუძნებლის, ბიძინა ივანიშვილის ადვოკატი ვიქტორ ყიფიანი სომხურ მედიასთან ინტერვიუში ხელისუფლების მიმართ კრიტიკული შეფასებებით გამოვიდა. მათ შორის, შეაფასა ე.წ. აგენტების კანონპროექტის მიღების შედეგად განვითარებული პროცესები და აღნიშნა, რომ ამ ყველაფერმა საქართველოს რეპუტაციულ ზიანი მოუტანა, ხელისუფლებამ კი „რისკები ვერ გათვალა“.
მმართველი გუნდისადმი ღიად კრიტიკული შეფასებების გათვალისწინებით, გაჩნდა კითხვა – შესაძლოა თუ არა ვიქტორ ყიფიანის სახით, ხელისუფლების სათავეში ახალი ლიდერი ვიხილოთ?
პოლიტოლოგი გია ხუხაშვილი PIA.GE-სთან საუბარში ასეთ შესაძლებლობას არ გამორიცხავს და მაგალითად მოჰყავს როგორც დღევანდელი, ისე, ყიფიანის ბოლო დროის აქტივობები ბიძინა ივანიშვილის უფლებადამცველის რანგში.
გია ხუხაშვილის თქმით, თუ ყიფიანი მართლაც ემზადება პოლიტიკაში მოსასვლელად, ეს ბიძინა ივანიშვილთან ყველა შემთხვევაში ექნება შეთანხმებული.
„ყველაფერი შეიძლება მოხდეს, მე არ ვიცი ვის რა აქვს ჩაფიქრებული, რა ვადებში და რას ტესტავს, მაგრამ თუ დავაკვირდებით ყიფიანის ბოლოდროინდელ აქტივობებს, ასე რომ ვთქვათ, ის მაკრო თემებზე ფიქრობს და პოლიტიკასთან პირდაპირი ან ირიბი შეხების საკითხებზე ხშირად საუბრობს ხოლმე. მათ შორის, სტატიებს აქვეყნებს და ასე შემდეგ. ასე რომ, მას შეიძლება ჰქონდეს პოლიტიკური ინტერესი. რაღაც დოზით, რა თქმა უნდა, ეს ყველა შემთხვევაში ივანიშვილთან იქნება შეთანხმებული, ბუნებრივია. ამ შეთანხმების უკან რა დგას, ამაზე ვერაფერს გეტყვით“, – ამბობს ხუხაშვილი.
პოლიტოლოგის თქმით, მოქმედი პრემიერ-მინისტრი ირაკლი ღარიბაშვილი ივანიშვილის თვალში უკვე სავარაუდოდ უინტერესო გახდა, როგორც პოლიტიკური ფიგურა.
„ის ჩვეულებრივი ფიგურაა, რომელსაც ათამაშებს იქამდე, სანამ ჩათვლის, რომ მისი რესურსი არ ამოიწურება. როცა ამოიწურება, პირველად ხომ არ გადაუგდია ეს ხალხი? არც მეორედ გადაგდების პრობლემა არ ექნება – როცა ჩათვლის, რომ ამის დრო დადგება. დღეის მდგომარეობით, საკმარისია თუ არა, თუ კიდევ რაღაცას შეტენის და მერე გადააგდებს, ეს უკვე პოლიტიკური ტაქტიკის საკითხია. ორივე ვარიანტი შეიძლება, მაგრამ ღარიბაშვილის რომ ე.წ. ნიჩაბზე დადებულია, ეს ნამდვილად ასეა“, – აცხადებს ხუხაშვილი.
ცნობისთვის, ვიქტორ ყიფიანის დაფუძნებულია იურიდიული ფირმა MKD Law, რომელიც შვეიცარიული ბანკის, „კრედიტ სუისის“ წინააღმდეგ ბიძინა ივანიშვილის ინტერესებს იცავს.
აღსანიშნავია, რომ ყიფიანის დღევანდელი განცხადებების კომენტირებისას, პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა ჟურნალისტებს განუცხადა, რომ ვიქტორ ყიფიანი უკვე გარკვეული პერიოდია აღარ თანამშრომლობს ბატონ ბიძინა ივანიშვილთან.
„ჩემს ხელთ არსებული ინფორმაციით, რომელიც ჯერ კიდევ წინა კვირას გავრცელდა, ბატონი ივანიშვილი არ სარგებლობს ბატონი ყიფიანის საადვოკატო მომსახურებით“, – განაცხადა ანრი ოხანაშვილმა.