The Financial Times: უკრაინის ომის გამო, ევროპას ასაფეთქებელი ნივთიერებების რაოდენობა ეწურება
ევროპაში ასაფეთქებელი ნივთიერებების მნიშვნელოვანი დეფიციტია, რაც უკრაინისთვის საბრძოლო მასალის დამზადების შესაძლებლობას მკვეთრად ზღუდავს, – ამის შესახებ The Financial Times-ი ევროპის თავდაცვის ინდუსტრიის წარმომადგენლებზე დაყრდნობით იუწყება.
გამოცემის ცნობით, დენთის, პლასტმასის ასაფეთქებელი ნივთიერებების და ტროტილის შეზღუდული მარაგი ხელს უშლის ევროპულ სამხედრო ინდუსტრიას სწრაფად შეასრულოს ევროკავშირის შეკვეთები უკრაინისთვის.
„ძალიან რთულია საარტილერიო საბრძოლო მასალის, განსაკუთრებით მძიმე, დიდი კალიბრის წარმოების გაზრდა მოკლე დროში“, – აცხადებს ჩეხეთის თავდაცვისა და უსაფრთხოების ინდუსტრიის ასოციაციის თავმჯდომარე ირჟი ჰანეკი.
თავდაცვის ინდუსტრიის წარმომადგენლები ამბობენ, რომ ევროპაში ასაფეთქებელი ნივთიერებების შეზღუდული მარაგია.
„შეუძლებელია ნიტროცელულოზის [დენთის შემადგენლობის ნაწილი ] წარმოების გაზრდა მოკლე დროში. თუ გვსურს მაგალითად დენთის წარმოების გაზრდა, ამას ალბათ სამი წელი დასჭირდება“, – აღნიშნა ჰანეკმა.
მისივე თქმით, ახლა ასაფეთქებელი ნივთიერებების წარმოების გაზრდა მხოლოდ იმ შემთხვევაშია შესაძლებელი, თუ ნედლეულის მნიშვნელოვან მოცულობებს ინდოეთიდან, კორეიდან და სხვა ქვეყნებიდან შემოიტანენ.