მოსახლეობა ევროკავშირის კანდიდატის სტატუსზე მეორე უარს ვერ გაიგებს - ზურაბიშვილი ბერბოკს
პრეზიდენტმა ასევე ხაზი გაუსვა საქართველოს პარტნიორი ქვეყნის საგარეო საქმეთა მინისტრის ვიზიტის მნიშვნელობას, როგორც გერმანიის მხრიდან საქართველოს დამოუკიდებლობისა და ევროინტეგრაციის უწყვეტი მხარდაჭერის გამოხატულებას.
"აშშ-ში ჩემი ბოლო ვიზიტისას სატელეფონო საუბარი მქონდა გერმანიის პრეზიდენტთან, რომელმაც დამიდასტურა საქართველოს ურყევი მხარდაჭერა და თქვენი აქ ყოფნაც ამის ნათელი დადასტურებაა", - განაცხადა, პრეზიდენტის ადმინისტრაციის თანახმად, სალომე ზურაბიშვილმა.
უწყების ცნობითვე, სალომე ზურაბიშვილთან შეხვედრისას ანალენა ბერბოკმა აღნიშნა, რომ ჩამოვიდა, რათა თქვას: "საქართველოს და მისი მოსახლეობის ევროკავშირში ხილვა სურს".
"ამიტომ ვარ აქ და ეს არის ის, რასაც ჩემი მთავრობა უჭერს მხარს. საქართველოს სჭირდება რეფორმების გაგრძელება იმისათვის, რომ კანდიდატის სტატუსი მიიღოს", - განაცხადა ბერბოკმა.
საქართველოში მყოფი გერმანიის საგარეო საქმეთა მინისტრი ქვეყნის პრეზიდენტთან შეხვედრამდე შეხვდა თავის ქართველ კოლეგას, მანამდე კი - არასამთავრობო ორგანიზაციების წარმომადგენლებს.
დაგეგმილია ასევე შეხვედრები პრემიერ-მინისტრთან, სტუდენტებთან და ოპოზიციის წარმომადგენლებთან. ანალენა ბერბოკი ასევე აპირებს ჩავიდეს საოკუპაციო ხაზთან.
გერმანიის საელჩოს მიერ გავრცელებული განცხადებით, საქართველოში ვიზიტით ქალბატონი ბერბოკის მთავარი გზავნილია, რომ გერმანია დიდი ძალისხმევით გააგრძელებს საქართველოს მხარდაჭერას ქვეყნის ევროკავშირთან და ნატოსთან დაახლოების გზაზე და ამისათვის საჭირო რეფორმების გატარებისას.