კევინ მაკარტი „რია ნოვოსტის“ ჟურნალისტს: არ ვუჭერ მხარს იმას, რაც თქვენმა ქვეყანამ გაუკეთა უკრაინას (ვიდეო)
0
„რია ნოვოსტის“ ჟურნალისტმა ისრაელში ვიზიტით მყოფ აშშ-ის კონგრესის წარმომადგენელთა პალატის სპიკერს და რესპუბლიკელთა უმრავლესობის ლიდერს კევინ მაკარტის კითხვა შემდეგი ფორმით დაუსვა: „ჩვენ ვიცით, რომ თქვენ არ უჭერთ მხარს უკრაინისთვის შეიარაღების ამჟამინდელ ულიმიტო და უკონტროლო მიწოდებას. შესაძლებელია, რომ უახლოეს მომავალში უკრაინისთვის იარაღის მიწოდებასთან დაკავშირებით ამერიკის პოლიტიკა შეიცვალოს?“
„თქვენ თქვით, რომ მე მხარს არ ვუჭერდი უკრაინას?! არა, მე ხმას ვაძლევდი უკრაინისთვის დახმარებას! მხარს ვუჭერ უკრაინის დახმარებას. მე არ ვუჭერ მხარს იმას, რაც თქვენმა ქვეყანამ გაუკეთა უკრაინას, მე ასევე არ ვუჭერ მხარს თქვენ მიერ ბავშვების მკვლელობას. ჩემი პოზიციაა, რომ უნდა გაიყვანოთ თქვენი ძალები. მე არ მიმაჩნია სწორად, რაც ხდება. ჩვენ გავაგრძელებთ მხარდაჭერას და ვფიქრობ, მთელი მსოფლიო ხედავს, რა ხდება სინამდვილეში“, – განაცხადა კევინ მაკარტიმ რუსი ჟურნალისტის შეკითხვის პასუხად.
