შრიოდერს ჯანმრთელობის გამო ჯერ არ შეუძლია ჩვენების მიცემა „ჩრდილოეთის ნაკად 2“-თან დაკავშირებით
გერმანიის ყოფილი კანცლერი გერჰარდ შრიოდერი ჯერ კიდევ ემოციურად გამოფიტულია, რის გამოც ვერ შეძლებს შეძლებს ჩვენების მიცემას საპარლამენტო კომისიისათვის, რომელიც იძიებს გაზსადენ „ჩრდილოეთის ნაკადი-2“-ის (Nord Stream 2) მშენებლობის გარემოებებს. როგორც „გერმანული ტალღა“ (DW) იუწყება ჟურნალ Der Spiegel-ზე დაყრდნობით, ამის შესახებ განაცხადა ყოფილი პოლიტიკოსის ფსიქოლოგმა.
ექსპერტის თქმით, გერმანიის მთავრობის ყოფილი ხელმძღვანელი ახლა თავს ოდნავ უკეთ გრძნობს, თუმცა, შრიოდერს ჯერ კიდევ არ შეუძლია გაუძლოს ხანგრძლივ დაკითხვას, რადგან „ყოფილი პოლიტიკოსი სწრაფად იღლება და ვერ ახერხებს რაიმეზე კონცენტრაციის შენარჩუნებას დიდი ხნის განმავლობაში“, - ამბობს ფსიქოლოგი.
გერჰარდ შრიოდერს 2025 წლის იანვრის ბოლოს უნდა მიეცა ჩვენება მეკლენბურგ-წინა პომერანიის ფედერალური მიწის ლანტაგში (პარლამენტში), მაგრამ ექს-კანცლერის წარმომადგენელმა წარადგინა ცნობა, რომ ყოფილ პოლიტიკოსს რესპირატორული დაავადება აწუხებდა. 4 თებერვალს 80 წლის შრიოდერის ადვოკატმა განაცხადა, რომ ყოფილი კანცლერი საავადმყოფოში იმყოფებოდა ემოციური გამოფიტვის გამო, რაც მისმა ექიმმაც დაადასტურა. ამ მიზეზით, შრედერი "უახლოეს მომავალში" ვერ შეძლებს "გაუმკლავდეს ფიზიკურ და ფსიქიკურ სტრესს, რომელიც დაკავშირებულია ხანგრძლივ - განსაკუთრებით საჯარო - დაკითხვასთან", - განაცხადა ადვოკატმა.
DW-ს მიხედვით, მეკლენბურგ-წინა პომერანიის ლანტაგის კომისია იკვლევს 2021 წლის იანვარში შექმნილი „კლიმატისა და გარემოს დაცვის“ ფონდის საქმიანობას. სინამდვილეში ფონდმა დიდი სამუშაო გასწია, ამერიკული სანქციების გვერდის ავლით, „ჩრდილოეთი ნაკადი 2“-ის მშენებლობის დასრულებაში, რისთვისაც „გაზპრომისგან“ 20 მილიონი ევრო მიიღო. ამ ცნობის გავრცელებამ აღმოსავლეთგერმანიის ფედერალური მიწის პრემიერ-მინისტრის, გერმანიის სოციალ-დემოკრატიული პარტიის (SPD) წევრის, მანუელა შვეზიგის მძაფრი კრიტიკა გამოიწვია.
შრიოდერი, რომელიც ხელმძღვანელობდა SPD-ს, ასევე იყო „გაზპრომის“ საკუთრებაში არსებული კომპანიის, „ჩრდილოეთის ნაკადი 2“-ის (Nord Stream 2) ოპერატორის დირექტორთა საბჭოს თავმჯდომარე. როგორც Der Spiegel წერს, 2020 წლის ზაფხულში, როდესაც ჯერ კიდევ განიხილებოდა „კლიმატისა და ეკოლოგიის დაცვის ფონდის“ შექმნა, შვეზიგი და შრიოდერი ერთმანეთს შეხვდნენ კუნძულ უზედომზე მიმდინარე მუსიკალურ ფესტივალზე, რის შემდეგაც ერთად გაემართნენ ხუთვარსკვლავიან სასტუმროში, სადაც სამსაათიანი საუბარი ჰქონდათ რუსეთის პრეზიდენტის, ვლადიმირ პუტინის ნდობით აღჭურვილ პირთან, მატიას ვარნიგთან. ვარნიგი იყო „ჩრდილოეთის ნაკადის“ (Nord Stream) აღმასრულებელი დირექტორი, რომელმაც ააგო მილსადენის პირველი ორი ხაზი და მოგვიანებით დაიკავა Nord Stream 2-ის აღმასრულებელი დირექტორის სავარძელი.
ფედერალური კანცლერის უწყებაში განაცხადეს, რომ საუბარში არ ყოფილა „არსებითი მინიშნებები“ „Nord Stream 2“-ზე და, რომ ეს იყო „პირადი მოსაზრებების გაცვლა“, თუმცა, მეკლენბურგ-წინა პომერანიის ლანტაგის კომისიის ხელმძღვანელი, ქრისტიან-დემოკრატიული პარტიის (CDU) წარმომადგენელი სებასტიან ელერსი მიიჩნევს, რომ შრიოდერი შეიძლება იყოს მნიშვნელოვანი მოწმე. პოლიტიკოსის დაკითხვის ახალი თარიღი ჯერ არ დასახელებულა.
გერჰარდ შრიოდერი გერმანიის კანცლერი იყო 1998 წლიდან 2005 წლამდე. გადადგომის შემდეგ მან მონაწილეობა მიიღო რუსეთთან დაკავშირებულ პროექტებში, მათ შორის გაზსადენ Nord Stream-ის მშენებლობაში. ის „როსნეფტის“ სამეთვალყურეო საბჭოს თავმჯდომარედ იქნა არჩეული. გასული წლის გაზაფხულზე შრიოდერმა ეს პოსტი საკუთარი ინიციატივით დატოვა. მანამდე ცოტა ხნით ადრე ევროპარლამენტმა განიხილა რუსი ოლიგარქების სანქციების სიაში მისი შეყვანის შესაძლებლობა.