რუსეთი უკრაინას ადანაშაულებს „კასპიის მილსადენების კონსორციუმის” სადგურზე შეტევის მცდელობაში
რუსეთის თავდაცვის სამინისტრომ დღეს, 24 მარტს, განაცხადა, რომ ღამის ორი საათისთვის „კიევის რეჟიმმა“ კრასნოდარის მხარეში უპილოტო საფრენი აპარატით შეუტია ნავთობის ტრანსპორტირების კომპანიის, „კასპიის მილსადენების კონსორციუმის” ნავთობის საქაჩ სადგურ „კროპოტკინსკაიას”.
თავდაცვის სამინისტროს მტკიცებით, რუსეთის საჰაერო თავდაცვის სისტემამ უკრაინული დრონი „გზად დაიჭირა“ სადგურიდან შვიდ კილომეტრში და მისი ფრაგმენტები ჩამოცვივდა რკინიგზის სადგურ „კავკაზკაიასთან“.
უკრაინას ნავთობის საქაჩ სადგურზე დღევანდელი შეტევის შესახებ არაფერი უთქვამს.
რუსეთის თავდაცვის სამინისტრო უკრაინის მხრიდან დრონებით შეტევის თაობაზე გავრცელებულ ცნობებში, როგორც წესი, კონკრეტულ ობიექტებს არ ასახელებს. დღევანდელ ოფიციალურ შეტყობინებაში ენერგოობიექტის დაკონკრეტება სამინისტროს, სავარაუდოდ, დასჭირდა იმის სათქმელად, რომ უკრაინა განაგრძობს ენერგოობიექტებზე დარტყმას, მიუხედავად იმისა, რომ აშშ-ს სხვა ინფორმაციას აწვდის.
კრასნოდარის მხარეში მდებარე ნავთობის საქაჩ სადგურ „კროპოტკინსკაიაზე” დრონებით შეტევა იყო 17 თებერვალსაც. უკრაინის სპეცსამსახურებში დაადასტურეს, რომ ეს მათი ოპერაცია იყო.
რუსეთის თავდაცვის სამინისტრომ 19 მარტსაც დაასახელა კონკრეტული ენერგოობიექტი, რომელსაც, მისი ინფორმაციით, უკრაინამ დრონებით შეუტია - კრასნოდარის მხარის სტანიცა კავკაზსკაიაში მდებარე ნავთობის საცავი.
ერთი დღით ადრე, 18 მარტს, აშშ-ის და რუსეთის პრეზიდენტების, დონალდ ტრამპის და ვლადიმირ პუტინის სატელეფონო საუბრის შემდეგ თეთრმა სახლმა განაცხადა, რომ ლიდერების შეთანხმებით, მშვიდობისკენ სვლა დაიწყება ენერგეტიკულ ობიექტებზე ცეცხლის შეწყვეტით.
20 მარტს რუსული წყაროები იუწყებოდნენ, რომ უკრაინის ძალებმა რუსეთის კურსკის ოლქის სუჯის რაიონში დაარტყეს გაზის გამზომ სადგურს. უკრაინის გენშტაბმა ამ ინფორმაციას ფეიკი უწოდა.